Музей кнігі

Даведайцеся пра шматвяковыя традыцыі беларускага кнігадрукавання ў кантэксце сусветнай гісторыі кнігі.

Азнаёмцеся з лепшымі ўзорамі друкарскай справы, выдадзенымі на працягу стагоддзяў у розных кутках свету.

У выставачнай зале (288 кв. м) дэманструюцца звыш 300 унікальных кніжных помнікаў: рукапісныя кнігі і старадрукі, рэдкія выданні XV–XXI стагоддзяў.

Сярод экспанатаў знаходзіцца жамчужына калекцыі – кнігі Бібліі (1517–1519) беларускага першадрукара Францыска Скарыны.

Сучаснае музейнае абсталяванне, неабходны экспанатам мікраклімат, рарытэтныя выданні розных часоў ствараюць захапляльную атмасферу падарожжа ў свет кніг.

У музеі вы таксама знойдзеце шмат цікавага пра гісторыю галоўнай бібліятэкі краіны.

Пастаянныя экспазіцыі:

Брама кніжных скарбаў

Экспазіцыя знаёміць з развіццём беларускага кнігадрукавання ў кантэксце сусветнай гісторыі кнігі, асаблівасцямі беларускай, еўрапейскай і ўсходняй кніжнай культуры.

Выстаўка змяшчае шэраг арыгінальных матэрыялаў з фондаў бібліятэкі (копіі архіўных дакументаў, бібліяграфічныя выданні, рукапісы), якія дазваляюць прасачыць багатую гісторыю станаўлення і развіцця галоўнай бібліятэкі краіны.

Выстаўкі:

На выставе ўпершыню прадстаўлены ўнікальныя экспанаты: перапіска XIX стагоддзя сям’і Храптовічаў і вернутыя з-за мяжы кнігі з іх знакамітай бібліятэкі у Шчорсах.

Таксама ў экспазіцыі будуць прадстаўленыя мастацкія творы студэнтаў БНТУ, якія працавалі валанцёрамі на летніках па добраўпарадкаванні маёнтка Храптовічаў у Шчорсах у 2018–2019 гадах.

Выстава арганізавана сумесна з дабрачынным фондам “Шчорсы і Храптовічы”.

Дзякуючы вядомаму бібліяфілу, калекцыянеру гравюр і экслібрысаў Алегу Судлянкову беларусы маюць магчымасць упершыню ўбачыць унікальную гравіравальную дошку ХVII ст. і ўзноўленую з яе па даўняй тэхналогіі гравюру з партрэтам караля і вялікага князя Яна ІІІ Сабескага.

Тэхналогія і друк гравюры з рарытэтнай дошкі XVII ст. паўтораныя мастаком-графікам Віктарам Саўчанкам і прадстаўленыя на выставе ў фармаце відэафільма.

Выстава прымеркавана да 170-годдзя з дня нараджэння гісторыка, археографа, краязнаўца Аляксея Парфёнавіча Сапунова (1851–1924).

Экспазіцыя створана на ўнікальных матэрыялах з асабістага архіва і бібліятэкі А.П. Сапунова. Сярод іх біяграфічныя дакументы, гімназічныя і студэнцкія сшыткі, перапіска з даследчыкамі. Прадстаўлены рукапісы, літаграфіі, планы, факсіміле дакументаў да легендарнай “Віцебскай даўніны” і іншых прац.

Сапраўдны рарытэт у экспазіцыі – рукапісная праца “Гісторыя г. Віцебска”, якая, на жаль, так і не была выдадзена.

На анлайн-выставе прадстаўлена поўная калекцыя старадрукаў “Вялікае мастацтва артылерыі” Казіміра Семяновіча, якая захоўваецца ў фондзе бібліятэкі.

На працягу стагоддзяў унікальная манаграфія была адной з найважнейшых і запатрабаваных у Еўропе навуковых прац, фундаментальнай крыніцай для тых, хто стаяў ля вытокаў сучаснага ракетабудавання і вывеў чалавецтва ў космас. Нездарма даследаванне было перакладзена на шматлікія еўрапейскія мовы (французскую, нямецкую, англійскую, польскую і інш.).

Тэматычныя экскурсіі:

Экскурсія для дзяцей "Падарожжа ў краіну кніжных скарбаў"

Экскурсія ў захапляльнай форме знаёміць юных наведвальнікаў 10–12 гадоў з гісторыяй кнігі: першымі пісьмовымі матэрыяламі, узнікненнем і традыцыйным афармленнем рукапіснай кнігі, з вынаходніцтвам кнігадрукавання і рознымі спосабамі афармлення друкаваных кніг.

Рэжым работы музея кнігі:

Аўторак, серада, пятніца: 10.30–19.00.
Чацвер, субота, нядзеля: 10.00–18.00.
Панядзелак – выхадны дзень.

У летні перыяд (з 1 чэрвеня па 31 жніўня):

Аўторак, серада, пятніца: 10.30–19.00.
Панядзелак, чацвер, субота: 10.00–18.00.
Нядзеля – выхадны дзень.

Кантактны тэлефон: (8 017) 293 25 85 (навукова-даследчы аддзел кнігазнаўства).

У музеі кнігі праводзяцца штодзённыя экскурсіі на платнай аснове. Час правядзення: з 10.00 да 17.00. Запіс на экскурсію папярэдні па тэл.: (8 017) 293 27 22 (сектар музейнай дзейнасці).