Канферэнцыя прайшла ў рамках мерапрыемстваў XXI Міжнароднага спецыялізаванага форума па тэлекамунікацыях, інфармацыйных і банкаўскіх тэхналогіях "ТІБО" і XXI Беларускага кангрэса па тэхналогіях інфармацыйнага грамадства.

З прывітальным словам выступілі начальнік упраўлення ўстаноў культуры і народнай творчасці Міністэрства культуры Рэспублікі Беларусь Шчэрбіч Вадзім Міхайлавіч і намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Суша Аляксандр Аляксандравіч.

Пад час мерапрыемстваў прагучалі выступленні па праблемах інавацыйнага развіцця ўстаноў культуры, навукі і адукацыі.

Удзельнікі семінара дзяліліся вопытам выкарыстання інфармацыйна-камунікацыйных тэхналогій у практыцы работы сучасных бібліятэк, музеяў, устаноў адукацыі і ўкараненні мабільных тэхналогій у сферу іх дзейнасці; разглядалі пытанні перспектыўных напрамкаў развіцця ва ўмовах электроннага асяроддзя, фарміраванні электроннага кантэнту і распрацоўкі электронных паслуг сферы культуры, узаемадзеяння ўстаноў культуры, навукі і адукацыі з мэтай стварэння адзінай інфармацыйнай прасторы, а таксама пытанні кадравага забеспячэння інфармацыйна-тэхналагічнага развіцця сферы культуры.

Акрамя таго, асвятляліся пытанні ўзаемадзеяння з патэнцыяльнымі карыстальнікамі інфармацыйных рэсурсаў, віртуальных і мультымедыйных сэрвісаў і паслуг. На канферэнцыі прагучала прапанова аб рэалізацыі сумеснага праекта з удзелам Нацыянальнай бібліятэкі Беларусі і СТАА "Мабільныя тэлесістэмы".

У мерапрыемстве прынялі ўдзел звыш ста чалавек з кіруючых устаноў і арганізацый культуры, навукі, адукацыі, выдавецкай справы, а таксама распрацоўшчыкі і пастаўшчыкі праграмнага забеспячэння і інтэрактыўных сэрвісаў. У якасці дакладчыкаў на канферэнцыі выступілі прадстаўнікі Нацыянальнага гістарычнага музея , Нацыянальнага мастацкага музея , Літаратурнага музея імя Янкі Купалы, СООО "Мабільныя тэлесістэмы", ААТ "Белгазпрамбанк", выдавецтвы "Чатыры чвэрці", ТАА "Голдэн Эльф", Рэспубліканскага цэнтра нацыянальных культур, Беларускага дзяржаўнага ўніверсітэта культуры і мастацтваў, ДУА "Інстытут культуры Беларусі", Барысаўскай цэнтральнай раённай бібліятэкі імя І.Х. Каладзеева, Нацыянальнай бібліятэкі Беларусі, Навукова-педагагічнай бібліятэкі, Навуковай бібліятэкі Беларускага нацыянальнага тэхнічнага ўніверсітэта.

Мадэратарам дыскусіі круглага стала “Якой быць Нацыянальнай электроннай бібліятэцы Беларусі” выступіў загадчык лабараторыі інфармацыйнага забеспячэння навуковых даследаванняў Аб’яднанага інстытута праблем інфарматыкі НАН Беларусі Грыгянец Рамуальд Браніслававіч.

З дакладам аб нацыянальным лічбавым кантэнце выступіла намеснік дырэктара па фарміраванні інфармацыйных рэсурсаў Нацыянальнай бібліятэкі Беларусі Кузьмініч Таццяна Васільеўна. Яна расказала аб тым, якія меры прадпрыняты для стварэння Нацыянальнай электроннай бібліятэкі і што яшчэ маецца быць зрабіць для рэалізацыі задуманага праекту.

Дырэктар Цэнтральнай навуковай бібліятэкі імя Якуба Коласа НАН Беларусі Груша Аляксандр Іванавіч прадставіў ідэю праекта, які закліканы палегчыць доступ да публікацый Нацыянальнай акадэміі навук.

Праграма канферэнцыі "Электронная культура"