З 21 па 24 красавіка 2009 года Нацыянальная бібліятэка Беларусі прымае ўдзел у XVI Міжнароднай спецыялізаванай выстаўцы па тэлекамунікацыях, інфармацыйных і банкаўскіх тэхналогіях “ТІБО-2009”.
Па маштабе экспазіцыі, аўтарытэтным складзе ўдзельнікаў, колькасці наведвальнікаў і ўвазе з боку СМІ форум “ТІБО” з’яўляецца прызнаным лідэрам сярод выставачных мерапрыемстваў у Рэспубліцы Беларусь. Гэта выстаўка для шырокага кола зацікаўленых асоб, як прафесіяналаў, так і звычайных карыстальнікаў.
На стэндзе Нацыянальнай бібліятэкі Беларусі прадстаўлена разнастайная інфармацыйная прадукцыя, сярод якой значнае месца займаюць базы даных як ўласнай вытворчасці, так і вядучых сусветных вытворцаў. Выстаўка шырока асвятляе выдавецкую і паліграфічную дзейнасць Нацыянальнай бібліятэкі Беларусі.
Наведвальнікі даведаюцца пра асноўныя інфармацыйныя рэсурсы і паслугі бібліятэкі (“Нацыянальная бібліятэка ў прэсе”, “Віртуальная чытальная зала”, “Віртуальны цэнтр прававой інфармацыі”, “Электронны архіў нацыянальнай перыёдыкі”,"Электронны каталог Нацыянальнай бібліятэкі Беларусі" і інш.).
Міжнародны форум “ТІБО” праводзіцца па ініцыятыве Міністэрства сувязі і інфарматызацыі з 1994 года. У падрыхтоўцы і правядзенні выстаўкі і кангрэса ўдзельнічаюць міністэрствы, прадпрыемствы і арганізацыі, у ліку якіх традыцыйна –Нацыянальная бібліятэка Беларусі.
Удзел у форуме “ТІБО” стварае спрыяльныя ўмовы для развіцця міжнароднага супрацоўніцтва, усебаковых зносін спецыялістаў, садзейнічае рэалізацыі стратэгіі інавацыйнага развіцця краіны, укараненню перадавых тэхналогій.