Краязнаўчы музей Пухавіцкага раёна, размешчаны на тэрыторыі сядзібы Бонч-Асмалоўскіх у вёсцы Блонь, захоўвае матэрыялы пра ўраджэнцаў гэтых мясцін – пісьменнікаў-маладнякоўцаў: Уладзіміра Хадыку, Міхася Чарота, Анатоля Вольнага, Алеся Дудара.
Працягваем знаёміць вас з жывым праектам “На хвалі часу, у плыні жыцця”, які ўвесь час папаўняецца новымі матэрыяламі. На гэты раз расказваем пра месца, дзе ўшаноўваецца памяць пісьменніка-маладнякоўца Уладзіміра Хадыкі (1905–1940), юбілей якога мы адзначалі ў 2020 годзе.
У вёсцы Блонь Пухавіцкага раёна знаходзіцца сядзіба Бонч-Асмалоўскіх – адна з шасці, размешчаных у гэтым раёне, якая адзіная цалкам захавалася. Цяпер там знаходзіцца краязнаўчы музей Пухаўшчыны, які захоўвае матэрыялы пра ўраджэнцаў гэтых мясцін і тых, хто наведваў гэты край.
Сядзіба Бонч-Асмалоўскіх. Жнівень 2021 г. Фота Т. Лаўрык
Тут створаны куток, прысвечаны ўраджэнцу Пухавіцкага раёна, Уладзіміру Хадыку – таленавітаму паэту і перакладчыку, які быў адным з арганізатараў нефармальнай суполкі ТАВІЗ – “Таварыства аматараў выпіць і закусіць”. Супрацоўнікі музея сабралі той нешматлікі матэрыял, які захоўваецца ў музейных фондах Беларусі пра гэтага аўтара.
Прадстаўляем куточак пісьменніка ў сядзібе Бонч-Асмалоўскіх, які змяшчае яго фатаграфіі і кнігі. Ганаровае месца тут займаюць і фота кніг з Нацыянальнай бібліятэкі Беларусі. У межах нашага праекта можна азнаёміцца з поўнымі тэкстамі некаторых з іх: “Суніцы” (1926), “Радасны будзень” (1935). Фотаздымкі экспанатаў музея сядзібы Бонч-Асмалоўскіх папоўнілі віртуальны раздзел, прысвечаны пісьменніку, на партале бібліятэкі.
Экспазіцыя краязнаўчага музея Пухавіцкага раёна. Жнівень 2021 г. Фота Т. Лаўрык
16 студзеня 2020 г. падчас Дня літаб’яднання “Маладняк” на святочнай імпрэзе ў Нацыянальнай бібліятэцы Беларусі быў прэзентаваны прысвечаны Уладзіміру Хадыку раздзел віртуальнага праекта “На хвалі часу, у плыні жыцця”, а на пасяджэнні круглага стала “Маладнякоўскімі крокамі” з дакладам пра пісьменніка выступіў укладальнік найбольш поўнага выдання твораў У. Хадыкі кандыдат філалагічных навук Анатоль Верабей.
Выступае Анатоль Верабей. 16.01.2020. Фота Н. Жарскай
Праект “На хвалі часу, у плыні жыцця” рэалізуецца Нацыянальнай бібліятэкай Беларусі сумесна з Дзяржаўным музеем гісторыі беларускай літаратуры, Беларускім дзяржаўным архівам-музеем літаратуры і мастацтва і Выдавецкім домам “Звязда” на працягу 2019–2023 гг.
Сачыце за нашымі навінамі!
Матэрыял пададзены інфармацыйна-аналітычным аддзелам.
