18 красавіка адбылося 10 бібліяграфічных урокаў па патрыятычным выхаванні для вучняў 7–11-х класаў сярэдніх школ №№ 24, 53, 62. 114. 153 і гімназіі № 11 г. Мінска з цыкла заняткаў “Пастараемся ж і мы быць годнымі іх Вялікай Перамогі”, які рэалізуецца Нацыянальнай бібліятэкай Беларусі да 80-годдзя Вялікай Перамогі сумесна з упраўленнямі па адукацыі г. Мінска.
Разведвальная аперацыя “Бібліятэка” распрацавана ў мэтах рэалізацыі праграмы патрыятычнага выхавання насельніцтва Рэспублікі Беларусь на 2022–2025 гг. і плана правядзення мерапрыемстваў, прысвечаных 80-й гадавіне вызвалення Рэспублікі Беларусь ад нямецка-фашысцкіх захопнікаў і перамогі савецкага народа ў Вялікай Айчыннай вайне.
Задачы аперацыі: вывучэнне інфармацыйнага патэнцыялу галоўнай бібліятэкі краіны па патрыятычным выхаванні, устанаўленне месцаў дыслакацыі экспанатаў, прысвечаных Вялікай Айчыннай вайне, кніжнага фонду, бібліяграфічнай і фактаграфічнай інфармацыі аб Брэсцкай крэпасці і Героях Савецкага Саюза.
Заброска дзесяці розных груп разведчыкаў у інфармацыйную прастору Нацыянальнай бібліятэкі Беларусі рабілася згодна з графікам мерапрыемстваў. Школьныя разведвальныя дазоры на чале з настаўнікамі вывучалі інфаполе бібліятэкі з дапамогай метадаў назірання, праслухоўвання, засады, пошуку, налёту, фатаграфавання, гутаркі з супрацоўнікамі, вывучэнне дакументаў.
Назіранне праводзілася ў зоне абслугоўвання чытачоў (кафедра выдачы літаратуры, зона каталогаў і картатэк) і камп’ютарным класе, падчас прагляду прэзентацый. Вучні-разведчыкі праслухалі песні “Брестский трубач” (музыка У. Рубін, словы Б. Дубровін) і “Довоенный вальс” (музыка П. Аеданіцкага, словы Ф. Лаўбе), урывак з твора Барыса Васільева “В списках не значился”, паведамленні супрацоўніка аб інфармацыйным патэнцыяле бібліятэкі і элементах бібліяграфічных запісаў на розныя віды дакументаў.
Засады школьнікі і гімназісты ладзілі ў канферэнц-зале і камп’ютарным класе міжнароднага прэс-цэнтра, дзе праходзілі бібліяграфічныя ўрокі “Непаўторная вясна 1940”, “Брэсцкая крэпасць-герой”, “Воіны-інтэрнацыяналісты ў вызваленні Беларусі ад нямецка-фашысцкіх захопнікаў”, “Брэсцкая крэпасць-герой”, “Героі Савецкага Саюза, якія вызвалялі Беларусь: па старонках друкаваных дакументаў і электронных рэсурсаў”.
Пошук інфармацыі ажыццяўляўся ў электронным каталогу, тапаграфічнай і сістэматычнай картатэках. У масівах картачнай і электроннай бібліяграфіі разведчыкі шукалі кнігі, газетныя і часопісныя артыкулы, прозу і паэзію пра абаронцаў Брэсцкай крэпасці, Герояў Савецкага Саюза і воінаў-інтэрнацыяналістаў, якія прымалі ўдзел у вызваленні Беларусі ад нямецка-фашысцкіх захопнікаў.
Фатаграфаванне рабілася ва ўсіх месцах дыслакацыі, пацвярджэннем чаго з’яўляюцца фатаграфіі да дадзенага артыкула. Актыўны ўдзел у фотафіксацыі даных прымала Аліса Лагодзіч, вучаніца 7 “Г” класа СШ № 24. Пры правядзенні пошукавых работ на выставах “Мова ваеннай ілюстрацыі” і “Аўтографы мужнасці” разведгрупамі ўстаноўлена і задакументавана месцазнаходжанне нямецкіх касак, радыёпрыёмніка, бінокля камісара партызанскай брыгады Мінскай вобласці ў футарале і трафейнага бінокля сухапутных войскаў Вермахта кампаніі “Carl Zeiss”, фотаапарата “Kodak”, літаграфіі Юрыя Зайцава “Абаронцы Брэста” (1984), працы “Гераічная абарона Брэсцкай крэпасці”.
Налёт на даведачныя выданні, газетныя артыкулы і вершы здзяйсняўся з засад у канферэнц-зале прэс-цэнтра з мэтай вывучэння розных відаў дакументаў і іх зместу. Рапарты, па выніках налёту, былі прадстаўлены кіраўніку разведгрупы ў форме верша або аповеду.
Гутарка з супрацоўнікам на ўсіх этапах правядзення разведкі спрыяла фарміраванню ведаў пра змест кніжнага фонду патрыятычнай тэматыкі, асаблівасцям працы з бібліяграфічнай інфармацыяй і рознымі відамі дакументаў. Падчас размовы таксама ўдалося здабыць сакрэтныя звесткі аб працы разведгрупы “Чэкіст” у Рацэўскіх лясах на Магілёўшчыне, што дазволіць удасканаліць тактыку вядзення разведкі ў будучыні.
Арыенціры і звесткі аб доследным аб’екце дазваляюць запісацца ў бібліятэку, знайсці і заказаць літаратуру па тэме, якая цікавіць, наведаць бібліятэчныя выставы, выкарыстоўваць у адукацыйным працэсе якасную вучэбную і навуковую літаратуру. Пры правядзенні разведвальнай аперацыі “Бібліятэка” высокі прафесіяналізм прадэманстравалі разведчыкі 24-й, 62-й і 153-й школ.
У вывучэнні станцый базіравання экспанатаў выставы, прысвечанай 80-годдзю Вялікай Перамогі “Мова ваеннай ілюстрацыі”, найбольш ярка праявілі сябе разведчыкі 9 “Б” СШ № 24 – Кацярына Шкатула, Ксенія Матыль, Іван Шчасны, Леанард Янушэвіч, Іван Гермель, Ілья Шабуневіч.
Дзмітрый Казусёнак і Дар’я Карчажынская з СШ № 62 арганізавалі праслухоўванне ўрыўка з твора Барыса Васільева “В списках не значился” і верша “Жажда” з трыпціха “Монументы Брестской крепости” (А. Голубеў, 1984).
Максім Зайцаў у радыусе дыслакацыі тапаграфічнай картатэкі ўстанавіў размяшчэнне бібліяграфічнай інфармацыі аб СШ № 153 А.К. Талая, а вучань 11 класа гэтай школы Андрэй Палянскі агучыў адсутную ў школьных падручніках інфармацыю аб аперацыі “Баграціён” і маршале Канстанціне Ракасоўскім.
Цыкл заняткаў “Пастараемся ж і мы быць годнымі іх Вялікай Перамогі”, прымеркаваны да 80-годдзя Вялікай Перамогі, уключае наступныя бібліяграфічныя ўрокі: “Даведачная літаратура пра Герояў Вялікай Айчыннай вайны”, “Воіны-інтэрнацыяналісты ў вызваленні Беларусі ад нямецка-фашысцкіх захопнікаў”, “Брэсцкая крэпасць-герой”, “Героі Савецкага Саюза, якія вызвалялі Беларусь: па старонках друкаваных дакументаў і электронных рэсурсаў”, “Біяграфічная і бібліяграфічная інфармацыя пра Героя Савецкага Саюза Мамадалі Тапвалдыева”.
Заказаць поўны цыкл або асобныя заняткі можна па тэлефонах: (8 017) 293 27 40, (8 029) 198 41 83; e-mail: polunchenkoolga@yandex.by.
Матэрыял пададзены аддзелам даведачна-інфармацыйнага абслугоўвання.