24 лістапада ўдзельнікі праекта “На хвалі часу, у плыні жыцця” наведалі радзіму Кузьмы Чорнага – аграгарадок Цімкавічы Капыльскага раёна, дзе прынялі ўдзел у мерапрыемстве “Пісьменнік вялікай душы”, прымеркаваным да дня ўшанавання памяці класіка беларускай прозы.
Кузьма Чорны (1900–1944) стаў сапраўдным брэндам Цімкавічаў. Землякі пісьменніка, нашчадкі тых самых жыхароў, некалі апісаных у яго творах, кожны дзень ходзяць тымі жа сцежкамі, бачаць тую самую хатку, куды маці пісьменніка прыбягала пазычыць кавалачак сала, калі сын ехаў паступаць у Нясвіжскую настаўніцкую семінарыю. У наш час цімкаўцы беражліва захоўваюць памяць пра свайго вядомага земляка, папулярызуюць яго спадчыну. Так, кожны год у Цімкавічах ладзіцца шэраг разнастайных ініцыятыў у гонар пісьменніка: экскурсіі ў Літаратурным музеі Кузьмы Чорнага, кніжныя выстаўкі і мерапрыемствы ў Цімкавіцкай сельскай бібліятэцы, тэматычныя ўрокі для школьнікаў. Найбольш буйным мерапрыемствам аграгарадка, якое збірае ўдзельнікаў з усёй Беларусі, з’яўляецца літаратурна-музычнае свята “Цімкавіцкія вытокі”, што праходзіць у чэрвені да дня нараджэння пісьменніка.
Традыцыйнымі ў Цімкавічах сталі і мерапрыемствы, прымеркаваныя да дня памяці Кузьмы Чорнага, якія ладзяцца штогод у канцы лістапада. Сёлета сустрэча, арганізаваная Літаратурным музеем Кузьмы Чорнага і Цімкавіцкай сельскай бібліятэкай, прайшла ў Цімкавіцкай сярэдняй школе, якая носіць імя празаіка.
Вядучая мерапрыемства, загадчыца Цімкавіцкай сельскай бібліятэкі Вольга Радкевіч
Асноўнай аўдыторыяй імпрэзы “Пісьменнік вялікай душы” былі вучні сярэдніх і старэйшых класаў, настаўнікі, прадстаўнікі Капыльскай раённай газеты “Слава працы”.
Падчас сустрэчы галоўны бібліёграф інфармацыйна-аналітычнага аддзела Нацыянальнай бібліятэкі Беларусі Юлія Амосава, распавяла дзецям пра тое, як памяць аб Кузьме Чорным ушаноўваюць у галоўнай бібліятэцы краіны, колькі захоўваецца тут кніг празаіка і на якіх мовах, пазнаёміла вучняў з найбольш цікавымі старонкамі віртуальнага раздзела пра пісьменніка, створанага ў межах праекта “На хвалі часу, у плыні жыцця”, а таксама нагадала пра 100-годдзе літаб’яднання “Маладняк”, сябрам якога з’яўляўся Кузьма Чорны. Улічваючы ўзрост слухачоў, выступленне было пабудавана ў форме дыялогу, насычана пытаннямі, а за правільныя адказы дзеці атрымалі сувеніры з бібліятэкі.
У мерапрыемстве прыняла ўдзел загадчыца аддзела выданняў і тэксталогіі Інстытута літаратуразнаўства імя Янкі Купалы НАН Беларусі Алена Васілевіч. Сёлета супрацоўнікамі інстытута і выдавецтвам “Беларуская навука” быў падрыхтаваны першы том акадэмічнага збору твораў Кузьмы Чорнага, які плануецца выдаць у 12-ці тамах з каментарыямі. У кнізе, у параўнанні са зборамі твораў, што пабачылі свет у 1950-х і 1990-х гадах, сабрана спадчына, якая раней друкавалася толькі на старонках перыёдыкі і зборнікаў. У новым выданні ўзноўлена мова пісьменніка, унікальныя словы, характэрныя толькі для жыхароў Цімкавічаў. З кнігай можна пазнаёміцца і ў фондах Нацыянальнай бібліятэкі.
Мерапрыемства было аздоблена выстаўкай фотаздымкаў з выявамі прыгожых краявідаў Цімкавічаў, куточкаў, якія яшчэ памятаюць Кузьму Чорнага. Работы былі створаны ў рамках сумеснага з фотаклубам “Мінск” фотапленэру “Родныя мае мясціны”.
Прэзентавала фотавыстаўку загадчыца Літаратурнага музея Кузьмы Чорнага Людміла Ніжэвіч. Людміла Іосіфаўна – даўні сябар і партнёр праекта “На хвалі часу, у плыні жыцця”, з яе дапамогай у 2020 годзе быў створаны віртуальны раздзел пра пісьменніка. Нагадаем, што ў праекце даступны поўныя тэксты артыкулаў Людмілы Ніжэвіч.
Цудоўным аздабленнем мерапрыемства сталі выступленні настаўнікаў Цімкавіцкай дзіцячай школы мастацтваў – акардэаніста Аляксандра Карповіча і цымбалісткі Веранікі Зянько, якія выканалі беларускія найгрышы. Напрыканцы імпрэзы слухачы натхніліся выканальніцкім майстэрствам загадчыцы Руднянскага сельскага дома культуры Ксеніі Валошынай, якая душэўна праспявала знакаміты “Мой родны кут” Ігара Лучанка.
Пазнавальным дапаўненнем да мерапрыемства стала наведванне Капыльскай раённай цэнтральнай бібліятэкі імя А. Астрэйкі, а таксама Алеі пісьменнікаў у Капылі, дзе сярод іншых аўтараў ушанавана памяць маладнякоўцаў, ураджэнцаў Капыльшчыны – Кузьмы Чорнага, Алеся Гурло, Яна Скрыгана і Адама Бабарэкі.
Бібліятэка дзякуе арганізатарам мерапрыемства, цудоўнай цімкавіцкай публіцы, а таксама партнёру праекта – Літаратурнаму музею Кузьмы Чорнага за плённае супрацоўніцтва і каштоўныя матэрыялы з фондаў музея, якія кожны год папаўняюць праект.
Матэрыял пададзены Юліяй Амосавай, галоўным бібліёграфам інфармацыйна-аналітычнага аддзела.
Фота капыльскай раённай газеты “Слава працы” і Літаратурнага музея Кузьмы Чорнага.