У Пушкінскім запаведніку “Міхайлаўскае” пачала працаваць выстаўка “Янка Купала і Якуб Колас – беларускія песняры”.
Выстаўка, прымеркаваная да 130-годдзя з дня нараджэння класікаў беларускай літаратуры,пачала працаваць 26 красавіка.
Сумесны выставачны праект Дзяржаўнага літаратурнага музея Янкі Купалы, Дзяржаўнага літаратурна-мемарыяльнага музея Якуба Коласа і Дзяржаўнага гісторыка-літаратурнага і прыродна-ландшафтнага запаведніка Аляксандра Пушкіна “Міхайлаўскае” здзейснены у рамках пагаднення аб супрацоўніцтве паміж трыма музеямі пры фінансавай падтрымцы Міністэрства культуры Рэспублікі Беларусь.
Выстаўка знаёміць з творчасцю Янкі Купалы і Якуба Коласа ў кантэксце рускай і сусветнай літаратуры, адлюстроўвае геаграфію сустрэч і сяброўства народных паэтаў Беларусі з рускімі пісьменнікамі. Разнастайныя музейныя калекцыі старэйшых літаратурных музеяў Рэспублікі Беларусь даюць магчымасць прайсці шляхамі Янкі Купалы і Якуба Коласа на рускай зямлі.
На выстаўцы экспануюцца ілюстрацыі да твораў песняроў знакамітых беларускіх мастакоў Георгія Паплаўскага, Арлена Кашкурэвіча, Міхаіла Басалыгі, Васіля Шаранговіча, Янкі Раманоўскага, Анатоля Александровіча, Лазара Рана, Барыса Заборава, Юрыя Зайцава, Георгія Грамыкі, Яўгена Ціхановіча, Эдуарда Агуновіча, работы якіх увайшлі ў залаты фонд беларускай кніжнай графікі XX – пачатку XXI стагоддзя.
Аснову літаратурна-дакументальнай часткі выстаўкі складаюць рукапісы перакладаў твораў Янкі Купалы рускімі літаратарамі, прыжыццёвыя выданні паэта з аўтографамі Валерыю Брусаву, Апалону Карынфскаму, Міхаілу Ісакоўскаму, Максіму Горкаму, выданні твораў Якуба Коласа на рускай мове, перапіска класікаў беларускай літаратуры з сябрамі і калегамі.
Асобная частка экспазіцыі выстаўкі прысвечана тэме “Беларускія песняры і Аляксандр Пушкін”, дамінантай якой з’яўляецца пераклад Янкі Купалы знакамітай паэмы Аляксандра Пушкіна “Медный всадник”, зроблены да 100-годдзя з дня смерці паэта.
Выстаўка “Янка Купала і Якуб Колас – беларускія песняры” – сведчанне сяброўства двух народаў, любові і павагі да несмяротнай спадчыны Аляксандра Пушкіна, Янкі Купалы і Якуба Коласа, працяг традыцый культурнага супрацоўніцтва беларускіх і расійскіх літаратурных музеяў.
Крыніца: Міністэрства культуры Рэспублікі БеларусьЧитайте также:
- Літаратурная вандроўка “Шляхамі паэтаў”
- В Молдове широко отметят 130-летие со дня рождения Купалы и Коласа
- Утвержден план мероприятий к юбилею Я. Купалы и Я. Коласа
- О мероприятиях к юбилею Янки Купалы и Якуба Коласа
- Праект плана мерапрыемстваў да юбілею Янкі Купалы і Якуба Коласа
- Выдадзены зборнік “Купала і Колас, вы нас гадавалі”
- Конкурс на создание проекта памятника Я. Купале и Я. Коласу в Варшаве
- О памятнике классикам белорусской литературы в Варшаве
