26 красавіка ў рамках мерапрыемстваў XIX Міжнароднай спецыялізаванай выстаўкі і кангрэса “ТІБО–2012” і XVI Міжнароднай спецыялізаванай выстаўкі “СМІ ў Беларусі” адбыўся навукова-практычны семінар “Электронная культура”.
З прывітальным словам выступілі загадчык лабараторыі Аб'яднанага інстытута праблем інфарматыкі НАН Беларусі Грыгянец Рамуальд Браніслававіч і намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Суша Аляксандр Аляксандравіч.
Пад час мерапрыемстваў прагучалі выступленні па праблемах мадэрнізацыі і аўтаматызацыі ўстаноў культуры і адукацыі. Удзельнікі семінара дзяліліся вопытам па ўкараненні новых інфармацыйных тэхналогій у практыку работы сучасных бібліятэк, музеяў, архіваў і г.д. Былі асветлены перспектыўныя напрамкі інфармацыйна-тэхналагічнага развіцця ўстаноў культуры ў святле выканання заданняў Дзяржаўнай праграмы “Культура Беларусі” на 2011–2015 гг. і Нацыянальнай праграмы паскоранага развіцця паслуг у сферы інфармацыйных тэхналогій на 2011–2015 гг.
У якасці дакладчыкаў на семінары выступілі прадстаўнікі Нацыянальнай бібліятэкі Беларусі, Інстытута культуры Беларусі, Цэнтральнай навуковай бібліятэкі імя Я. Коласа НАН Беларусі, Нацыянальнага мастацкага музея Рэспублікі Беларусь, бібліятэкі Акадэміі кіравання пры Прэзідэнце Рэспублікі Беларусь, Беларускага навукова-даследчага цэнтра электроннай дакументацыі, Беларускага дзяржаўнага ўніверсітэта культуры і мастацтваў, Інстытута гісторыі НАН Беларусі, а таксама супрацоўнікі навукова-вытворчай фірмы “ІНЕАК” і СААА «Сілабс».
Слухачамі і ўдзельнікамі дыскусій з’яўляліся прадстаўнікі вядучых ўстаноў культуры краіны: Беларускага дзяржаўнага музея гісторыі Вялікай Айчыннай вайны, Нацыянальнага гістарычнага музея Рэспублікі Беларусь, Нацыянальнага акадэмічнага драматычнага тэатра імя Я. Коласа, Нацыянальнага акадэмічнага тэатра оперы і балета Рэспублікі Беларусь, Фундаментальнай бібліятэкі БДУ, абласных і многіх іншых бібліятэк, музеяў і тэатраў абласнога і рэспубліканскага значэння.
