26 красавіка ў Нацыянальнай бібліятэцы Беларусі ладзілася ўрачыстае адкрыццё Фестывалю турэцкай культуры.
Фестываль прысвечаны 20-годдзю ўсталявання дыпламатычных адносін паміж Рэспублікай Беларусь і Рэспублікай Турцыя.
Арганізатарамі мерапрыемства выступілі грамадскае аб’яднанне "Дыялог Еўразія" сумесна з Нацыянальнай бібліятэкай Беларусі пры падтрымцы Пасольства Рэспублікі Турцыя ў Рэспубліцы Беларусь, інстытута "Юнус Эмрэ" (г. Анкара, Турцыя) і адміністрацыі раёна Енімахале (г. Анкара, Турцыя).
З прывітальным словам на цырымоніі адкрыцця фестывалю выступілі дырэктар Нацыянальнай бібліятэкі Беларусі Раман Матульскі, Надзвычайны і Паўнамоцны Пасол Рэспублікі Турцыя ў Рэспубліцы Беларусь Джават Нэзіх Азкая, старшыня грамадскага аб’яднання "Дыялог Еўразія" Іхсан Дылекчы.
У рамках мерапрыемства адбылося адкрыццё мастацкіх выставак "Свет Эбру" Ахмета Акгюна, "Стамбул – сталіца цывілізацый" (гравюры Мелікшаха Сайцюрка), а таксама прайшло ўручэнне ўзнагарод за ўклад у развіццё беларуска-турэцкіх адносін.
Госці вечара прынялі ўдзел у майстар-класе Эбру і атрымалі асалоду ад творчасці народных калектываў Турцыі і Беларусі.
