Восень – час планавання і вызначэння мэт на наступны год. І каляндар – першы памагаты ў гэтай справе. У музеі кнігі на юбілейнай выставе “5+5+5” можна ўбачыць рарытэтны асобнік кішэннага календара ХІХ ст. з калекцыі мініяцюрных выданняў.
Яго памер – 85х50 мм. Гэта нямецкі кішэнны каляндар-сумка на 1854 г., выдадзены ў Мюнхене. Акрамя традыцыйнай каляндарнай сеткі з астранамічнымі данымі, утрымлівае пералік памятных дат на кожны месяц.
Старонкі аздоблены каляровымі гравюрамі з цытатамі, якія ілюструюць літаратурныя творы, надзвычай папулярныя сярод нямецкай грамадскасці ХІХ ст. Першая група прысвечана кананічнаму вершу нямецкай літаратуры “Песня звона” Фрыдрыха Шылера. Другая ілюструе раман амерыканскай пісьменніцы Гарыет Бічэр-Стоу “Хаціна дзядзькі Тома”.
Экзэмпляр мае скураны пераплёт з клапанам. Выданне камплектавалася алоўкам для зручнасці карыстання і магчымасці рабіць запісы. Аб гэтым сведчыць прадаўгаватая кішэня-адтуліна ўнутры пераплёту. Аловак адсутнічае. На апошніх чыстых старонках календара, запланаваных для нататак, ёсць запісы простым алоўкам.
Вокладку мініяцюрнага выдання ўпрыгожвае залатое цісненне з расліннымі матывамі. Абрэз кнігі таксама залаты.
Шукайце рарытэтны кішэнны каляндар ХІХ ст. сярод пяцёркі рэдкіх кніг на выставе “5+5+5”.
Выстава “5+5+5” будзе працаваць у музеі кнігі (пам. 347) да 24 кастрычніка 2021 г.
Дата яе завяршэння можа быць зменена.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Матэрыял пададзены навукова-даследчым аддзелам кнігазнаўства.