9 верасня ў музеі кнігі Нацыянальнай бібліятэкі Беларусі адбылося ўрачыстае адкрыццё выставы “5+5+5”, прысвечанай 15-годдзю музея кнігі.
З прывітальным словам да ўдзельнікаў імпрэзы звярнуўся намеснік генеральнага дырэктара Нацыянальнай бібліятэкі Беларусі Аляксандр Суша. Ён павіншаваў усіх з адметнай падзеяй – 15-годдзем музея кнігі − знакавай культурнай інстытуцыі, якая з’явілася ў новым будынку галоўнай бібліятэкі краіны ў 2006 г. Выступоўца распавёў прадгісторыю стварэння музея і выказаў шчырыя словы ўдзячнасці ўсім ініцыятарам і арганізатарам музея. Падкрэсліў важнасць гэтай адметнай экспазіцыйнай прасторы для Нацыянальнай бібліятэкі Беларусі, і выказаў упэўненасць у тым, што музей кнігі будзе актыўна развівацца і здзіўляць новымі праектамі.
Славіна Гаўрылава, загадчыца філіяла “Музей беларускага кнігадрукавання” Нацыянальнага Полацкага гісторыка-культурнага музея-запаведніка, павіншавала калег з юбілеем і азначыла, што не зважаючы на “падлеткавы” ўзрост калектывам зроблена шмат глыбокіх і адметных праектаў. Распавяла пра сумесную працу і культурныя ўзаемасувязі, якія існуюць паміж роднаснымі музеямі, пажадала плёну і новых цікавых выстаў і ініцыятыў.
Таццяна Захарава, загадчыца сектара музейнай дзейнасці навукова-даследчага аддзела кнігазнаўства, падзякавала ўсім пачынальнікам і стваральнікам музея кнігі і пазнаёміла гасцей і ўдзельнікаў імпрэзы з юбілейнай выставай “5+5+5”, у межах якой прадстаўлены: 5 рукапісаў, 5 старадрукаў і 5 рэдкіх выданняў − 15 сапраўдных рарытэтаў з фондаў бібліятэкі, якія выключна рэдка пакідаюць фондасховішча.
Цудоўную ўрачыстую атмасферу стварыла выступленне лаўрэата міжнародных конкурсаў, стыпендыята Спецыяльнага фонду Прэзідэнта Рэспублікі Беларусь па падтрымцы таленавітай моладзі Настассі Несцярэўскай, якая выканала некалькі лірычных кампазіцый падчас адкрыцця выставы.
Выстава “5+5+5” будзе працаваць у музеі кнігі да 31 снежня 2021 г.
Матэрыял пададзены навукова-даследчым аддзелам кнігазнаўства.
Чытайце таксама: