13 сакавіка ў Гомелі, у Беларускім дзяржаўным універсітэце транспарту адбыўся семінар “Публікацыйная актыўнасць вучонага”.
Вітаючы ўдзельнікаў семінара, прарэктар па навуковай працы ўніверсітэта Аляксандр Ерафееў, падкрэсліў актуальнасць і важнасць дадзенага мерапрыемства.
Пра замежныя і айчынныя электронныя інфармацыйныя рэсурсы, даступныя праз віртуальную чытальную залу Нацыянальнай бібліятэкі Беларусі (НББ), распавёў супрацоўнік аддзела карпаратыўнага ўзаемадзеяння Руслан Доўгі.
Загадчык сектара аддзела карпаратыўнага ўзаемадзеяння НББ Вячаслаў Брычкоўскі ў дакладзе “Адкрытая навука і практыка кіравання даследчымі данымі” асноўную ўвагу надаў найважнейшым праблемам стварэння і выкарыстання электронных рэсурсаў адкрытага доступу ва ўмовах лічбавай трансфармацыі навукі і адукацыі.
Прадстаўнік выдавецтва Wiley Наталля Каліцава распавяла пра магчымасці платформы Wiley Online Library для інфармацыйнага забеспячэння інавацыйнай дзейнасці ВНУ.
Асаблівы інтарэс выклікала магчымасць бясплатных публікацый артыкулаў у рэжыме адкрытага доступу для вучоных з Беларусі.
Адбыўся абмен меркаваннямі аб выкарыстанні рэсурсаў і сэрвісаў віртуальнай чытальнай залы НББ у інфармацыйным забеспячэнні навучальнага працэсу і навуковых даследаванняў з мэтай павышэння рэйтынгу ўніверсітэта.
Праведзены трэнінг для супрацоўнікаў універсітэта па асноўных сэрвісах пошуку падыходзячых часопісаў выдавецтва Wiley для публікацыі сваіх артыкулаў, Discovery-сэрвісам Нацыянальнай бібліятэкі Беларусі і магчымасцям сайта “Беларусь у інфармацыйнай прасторы”.
Матэрыял прадастаўлены аддзелам карпаратыўнага ўзаемадзеяння.
