21 верасня ў бібліятэцы нямецкая пісьменніца, гісторык, дацэнт універсітэта імя Вашынгтона ў Сент-Луісе (ЗША) Аніка Вальке прадставіла сваю кнігу “Піянеры і партызаны: вусная гісторыя нацысцкага генацыду ў Беларусі”.
Жоўтыя латы і нашытыя на адзенне зоркі –сімвалы страшнага злачынства супраць яўрэйскага насельніцтва ў гады Вялікай Айчыннай вайны. Падчас нямецкай акупацыі Беларусі фашысты знішчылі 800 000 яўрэяў.
Ужо многа гадоў Аніка Вальке займаецца тэмай Халакосту, сустракаецца з яўрэямі, якія выжылі падчас вайны, каб даведацца, як атрымалася ў гэтых людзей перажыць нямецкую акупацыю і як яны жылі ў савецкім грамадстве пасля вайны, як успрымалі сітуацыю, у якой быць яўрэем значыла быць лішняй істотай...
“Абапіраючыся на вусныя гісторыі, відэа сведак генацыду і ўспаміны, сабраныя ў былым СССР, я паказваю, як маладыя савецкія яўрэі змагаліся за выжыванне”, – расказвае пра сваю працу Аніка Вальке. Апошнія 15 гадоў яна даследуе і збірае архіўныя матэрыялы па справе Халакосту, да якіх удаецца атрымаць доступ, у розных кропках свету (Беларусь, Расія, Германія, Ізраіль, ЗША).
Часовы Павераны ў справах ЗША ў Рэспубліцы Беларусь Роберт Райлі адзначыў актуальнасць працы Анікі Вальке: "Сёння ў свеце здзяйсняецца многа спроб перапісаць гісторыю вайны і паднесці яе ў больш пазітыўным святле. Такія грунтоўныя даследаванні, пацверджаныя фактамі і лічбамі, дазволяць захаваць гісторыю такой, якой яна была на самай справе". Спадар Райлі падзякаваў за аглядную экскурсію па вялікаму будынку Нацыянальнай бібліятэкі і перадаў у дар кнігу А. Вальке "Піянеры і партызаны: вусная гісторыя нацысцкага генацыду ў Беларусі".
Дырэктар Нацыянальнай бібліятэкі Беларусі Раман Матульскі ў якасці памятнага падарунка паднёс Роберту Райлі кнігу пра "беларускі алмаз", а Аніке Вальке як даследчыцы беларускай гісторыі – сваю кнігу "Из прошлого в будущее. Библиотеки Беларуси".