Калекцыя кніжных помнікаў Нацыянальнай бібліятэкі Беларусі папоўнілася англамоўным выданнем “Вялікае мастацтва артылерыі” (1729) беларускага вучонага Казіміра Семяновіча.
Калекцыя бібліятэкі папоўнілася ўнікальным выданнем Калекцыя кніжных помнікаў Нацыянальнай бібліятэкі Беларусі папоўнілася англамоўным выданнем “Вялікае мастацтва артылерыі” (1729) беларускага вучонага Казіміра Семяновіча.
Дзякуючы спонсарскай падтрымцы ААТ “БПБ-Ашчадбанк” у 2012 годзе фонд бібліятэкі папоўніўся двума прыжыццёвымі выданнямі К.Семяновіча “Вялікае мастацтва артылерыі”: на лацінскай і французскай мовах 1650 і 1651 гадоў выдання. Міжнародная група Ашчадбанка Расіі ў асобе ААТ “БПБ-Ашчадбанк” ва ўрачыстай абстаноўцы перадала рарытэтныя выданні ў дар бібліятэцы пад час правядзення прэс-канферэнцыі па пашырэнні міжнароднай дзейнасці банка.
У 2014 годзе дзякуючы спонсарскай падтрымцы ААТ “БПБ-Ашчадбанк” калекцыя папоўнілася англамоўным выданнем К.Семяновіча “Вялікае мастацтва артылерыі” (1729), якое адсутнічае ў іншых кнігасховішчах Беларусі.
У прадмове да англійскага выдання кнігі яе перакладчык Джордж Шэлвак прызнаваў: “Аўтарытэт Казіміра Семяновіча быў і да сённяшняга дня застаецца для ракетчыкаў і феерверкераў чымсьці святым”. К.Семяновіч быў сапраўдным вучоным, у сваёй працы абапіраўся на апошнія, найноўшыя дасягненні навукі таго часу і на вынікі ўласных эксперыментаў. Ён зрабіў шэраг цікавых і перспектыўных вынаходстваў. Кніга адразу ж была перакладзена на шматлікія еўрапейскія мовы, і амаль што не два стагоддзі заставалася самай папулярнай навуковай работай па артылерыі. Яго навуковыя працы і эксперыменты на шматлікія гады абумовілі шляхі развіцця еўрапейскай навукі ў сферы артылерыі і ракетабудавання. Менавіта праца К.Семяновіча лягла ў аснову будучага касмічнага ракетабудаўніцтва.
Набыццё гэтых старадрукаў мае вялікае значэнне для Беларусі, бо яны адсутнічалі да гэтага моманту ў беларускіх бібліятэках і музеях.
Нацыянальная бібліятэка Беларусі, якая выконвае функцыю нацыянальнага кнігасховішча, беражліва захоўвае самы вялікі ў краіне і ўніверсальны па сваім характары фонд кніжных каштоўнасцей айчыннай і сусветнай культуры, а таксама рупіцца пра папаўненне кнігазбору. Перадача ў дар унікальнага выдання вядучай бібліятэцы краіны з’яўляецца сведчаннем сацыяльнай адказнасці кампаніі “БПБ-Ашчадбанк”, яе зацікаўленасці ў захаванні і папулярызацыі нацыянальнай культурнай спадчыны.
Чытайце таксама: