24 верасня ў Круглай зале адбылася перадача ў дар Нацыянальнай бібліятэцы Беларусі дзвюх старадрукаваных кніг XVII ст. “Великое искусство артиллерии”, якія маюць культурнае значэнне для Рэспублікі Беларусь.
Аўтар – вядомы беларускі вучоны Казімір Семяновіч. Акцыя прайшла ў рамках Года кнігі і прымеркавана да 90-годдзя Нацыянальнай бібліятэкі Беларусі.
Міжнародная група Ашчаднага банка Расіі праз прадстаўніцтва ААТ “БПС- Ашчадбанк” ва ўрачыстай абстаноўцы перадала рарытэтнае выданне XVII ст. у дар Нацыянальнай бібліятэцы пад час правядзення прэс-канферэнцыі па расшырэнні міжнароднай дзейнасці Ашчадбанка.
У фонд бібліятэкі былі перададзены два першыя выданні трактата “Великое искусство артиллерии”: адно на лацінскай мове 1650 года і другое ў перакладзе на французскую мову 1651 года выдання выпуску. Дадзеныя кнігі БПС-Ашчадбанк набыў у адной з антыкварных букіністычных крам Германіі.
Дзякуючы трактату “Великое искусство артиллерии” наш суайчыннік Казімір Семяновіч займае сваё месца сярод заснавальнікаў сусветнай ракетнай балістыкі і касманаўтыкі. Манаграфія складаецца з пяці частак і ўключае 206 гравюр па малюнках, выкананых самім аўтарам.
На мерапрыемстве выступілі старшыня праўлення БПС-Ачшчадбанка Васіль Станіслававіч Мацюшэўскі, дырэктар Нацыянальнай бібліятэкі Беларусі Раман Сцяпанавіч Матульскі, бібліёграф аддзела кнігазнаўства Таццяна Іванаўна Рошчына.
Пасля цырымоніі адбылася прэс-канферэнцыя для прадстаўнікоў сродкаў масавай інфармацыі, а для гасцей была праведзена экскурсія па будынку Нацыянальнай бібліятэкі Беларусі.
 |
 |
 |
