2 ліпеня ў Музеі Незалежнасці ў Варшаве Пасольствам Рэспублікі Беларусь у Рэспубліцы Польшча было арганізавана мерапрыемства, прысвечанае святкаванню Дня Незалежнасці Рэспублікі Беларусь і 75-годдзю Перамогі ў Вялікай Айчыннай вайне.
У рамках мерапрыемства адбылося адкрыццё фотавыставы “Беларусь: прыгожыя імгненні”, падрыхтаванай Нацыянальнай бібліятэкай Беларусі сумесна з тэлеканалам “Беларусь 24” да Года малой радзімы. У экспазіцыю праекта ўвайшлі працы вядомых беларускіх фатографаў, якія распавядаюць аб унікальнай культуры краіны, прыгажосці прыроды, дабрыні і жыццерадаснасці яе жыхароў. У працах беларускіх фатографаў Беларусь паўстае прыгожай, разнастайнай і непаўторнай краінай з шматвяковай гісторыяй, помнікамі старажытнай культуры і архітэктуры, сучаснымі будынкамі і наватарскімі ідэямі.
З прывітальным словам да гасцей мерапрыемства звярнуліся Надзвычайны і Паўнамоцны Пасол Рэспублікі Беларусь у Рэспубліцы Польшча Уладзімір Чушаў і дырэктар Музея Незалежнасці ў Варшаве Тадэвуш Скочак. “Выстаўка была створана па ініцыятыве Нацыянальнай бібліятэкі Беларусі. Уся экспазіцыя складаецца з 20 фотаздымкаў вядомых фотамастакоў і адлюстроўвае людзей, пейзажы, помнікі і, можна сказаць, проста паўсядзённыя разнастайныя каларыты. Спадзяюся, паважанае спадарства, вы адчуеце ў кожным здымку гэты вытанчаны дух любові да сваёй зямлі, ацэніце тонкае майстэрства беларускіх мастакоў”, – адзначыў у сваім выступе спадар Пасол.
На мерапрыемстве прысутнічалі Надзвычайныя і Паўнамоцныя паслы Расійскай Федэрацыі і Дзяржавы Ізраіль у Рэспубліцы Польшча, прадстаўнікі грамадскіх аб’яднанняў і дзелавых колаў, СМІ.
У Варшаўскім Музеі Незалежнасці дэманстрацыя фотавыставы працягнецца да 22 ліпеня.
Спадзяёмся, што гэты прыгожы праект дасць магчымасць замежным гледачам убачыць Беларусь з нечаканага боку.
Матэрыял пададзены аддзелам сувязей з грамадскасцю.