З 10 мая па 5 чэрвеня ў чытальнай зале міжбібліятэчнага і індывідуальнага абанемента (пам. 164) будзе экспанавацца выстава “Музеі – захавальнікі часу”, прымеркаваная да Міжнароднага дня музеяў.
Гэты Дзень заснаваны ў 1977 годзе па ініцыятыве Міжнароднага савета музеяў і сёння адзначаецца 18 мая больш за 20 000 музеямі.
Прадстаўленыя на выставе дакументы распавядаюць пра гісторыю музеяў, іх значнасць у захаванні культурнай і прыроднай спадчыны, здзіўляюць разнастайнасцю існуючых музейных форм, знаёмяць з вядомымі музеямі свету, іх экспазіцыямі і ўнікальнымі экспанатамі.
У цэнтры ўвагі – выданні, прысвечаныя музейнай справе Беларусі і музеям, якімі ганарыцца наша краіна.
Асобную частку экспазіцыі складаюць кнігі пра знакамітыя музеі Расіі.
Час працы выставы адпавядае рэжыму працы чытальнай залы міжбібліятэчнага і індывідуальнага абанемента.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 10.
Матэрыял пададзены аддзелам бібліятэчнага абслугоўвання.
