24 сакавіка ў Нацыянальнай бібліятэцы адбылася ўрачыстая цырымонія ўзнагароджання пераможцаў па выніках рэспубліканскага анлайн-конкурсу чытальнікаў “О, Беларусь, мая шыпшына”.
Анлайн-конкурс чытальнікаў, прысвечаны 120-годдзю з дня нараджэння беларускага пісьменніка Уладзіміра Дубоўкі, стаў ініцыятывай бібліятэкі сумесна з партнёрамі праекта “На хвалі часу, у плыні жыцця”. Інфармацыйнымі партнёрамі, якія і падрыхтавалі прызы ўдзельнікам, выступілі часопісы “Бярозка” і “Маладосць” (у тым ліку Выдавецкі дом “Звязда”). Конкурс праходзіў з 1 кастрычніка па 15 лістапада 2020 года.
З прывітальным словам да прысутных звярнуўся намеснік генеральнага дырэктара Нацыянальнай бібліятэкі Беларусі Алесь Cуша. Галоўны бібліёграф інфармацыйна-аналітычнага аддзела НББ, сябра аргкамітэта Настасся Жарская распавяла пра асаблівасці правядзення конкурсу.
У мерапрыемстве прымалі ўдзел сябры журы: дацэнт філалагічнага факультэта Беларускага дзяржаўнага ўніверсітэта Ірына Багдановіч і паэтка, перакладчыца, кандыдат філалагічных навук Аксана Данільчык; а таксама дырэктар Дзяржаўнага музея гісторыі беларускай літаратуры Сяргей Усік і старшыня Беларускага фонду культуры Тадэвуш Стружэцкі.
Ад інфармацыйных партнёраў конкурсу выступілі намеснік галоўнага рэдактара часопіса “Маладосць” Дзмітрый Шулюк і галоўны рэдактар часопіса “Бярозка" Кацярына Каплун, а таксама бібліятэкар Пастаўскай дзіцячай бібліятэкі імя У. Дубоўкі Людміла Сяменас, якая таксама ўдзельнічала ў анлайн-конкурсе.
Дыпломамі і прызамі былі ўзнагароджаны:
- у катэгорыі 6–9 гадоў – Аляксандра Рудэнка, Станіслаў Сашко і Вікторыя Кулік;
- у катэгорыі 10–13 гадоў – Арсеній Астаповіч, Захар Прыбыш, Раман Сасноўскі, Цімур Жырны, Ульяна Мурманцава і Ганна Чамаданава;
- у катэгорыі 14–17 гадоў – Дар’я Ціханская, Сяргей Бярозка, Анастасія Феданюк, Ягор Троцкі;
- у катэгорыі ад 18 гадоў – Марына Мандзік, Аляксандр Матошка і Вераніка Сакалова.
Прыз глядацкіх сімпатый атрымалі Эліна Рогалева і Іван Скарабагатаў; прызы сімпатый ад часопіса “Маладосць” – Арына Колесава і Ягор Кузаўкоў; прыз сімпатый ад народнага літаратурнага тэатра “Жывое слова” – Яраслаў Шчэрбаў і Таццяна Новікава. Таксама былі ўручаны граматы і памятныя прызы пераможцам конкурсу ад Беларускага фонду культуры і Дзяржаўнага музея гісторыі беларускай літаратуры.
Прыемна адзначыць, што ў нашага праекта з’явіўся новы партнёр – Вялікі тэатр Беларусі. Алесь Суша ад імя партнёра ўручыў пераможцам конкурсу запрашэнні на оперу П. Вальдгардта “Кошкін дом” (рэжысёр Д. Пататурка) па матывах аднайменнай казкі С. Маршака.
Цёплую і шчырую атмасферу вечарыны творчымі выступленнямі падтрымалі народны літаратурны тэатр “Жывое слова” пад кіраўніцтвам сябра журы Алесі Сівохінай і ўдзельнікі конкурсу, якія пранікліва чыталі вершы У. Дубоўкі і выконвалі песні на словы паэта. Вельмі сардэчна прагучала музычнае выкананне ўласнага сачынення Таццяны Аржаноўскай, пераможцы конкурсу ў намінацыі “За лепшае музычнае ўвасабленне верша”.
Для ўдзельнікаў мерапрыемства было арганізавана наведванне музея кнігі і агляднай пляцоўкі Нацыянальнай бібліятэкі.
Вялікі дзякуй усім! Віншуем пераможцаў з узнагародамі!
З творчымі працамі ўдзельнікаў можна азнаёміцца ў суполцы “О, Беларусь, мая шыпшына” на Facebook, а таксама ў адмыслова створаным плэй-лісце на платформе YouTube.
Матэрыял пададзены інфармацыйна-аналітычным аддзелам.