Працягваем серыю навін пра каштоўныя матэрыялы, якія папоўнілі электронныя фонды Нацыянальнай бібліятэкі. Сёння прадстаўляем п’есу і зборнік вершаў Андрэя Александровіча, алічбаваныя копіі якіх перадаў для віртуальнага праекта “На хвалі часу, у плыні жыцця” ўнук пісьменніка Алег Радаслававіч Александровіч.
Творы былі напісаны падчас знаходжання пісьменніка ў папраўча-працоўным лагеры Дудзінка, што на рацэ Енісей у паўночна-заходняй частцы Сібіры. У Алега Радаслававіча захаваўся фотаздымак дзеда тых часоў з подпісам на адваротным баку, які прызначаны жонцы, сыну і дачцэ паэта.
1945 годам датуецца і п’еса “Под небом отчизны” ў чатырох дзеях і шасці карцінах, напісаная для пастаноўкі ў лагерным тэатры. Падзеі твора адбываюцца ў чэрвені 1941 года, калі ў мірнае жыццё маладых людзей, нібы віхор, урываецца вайна.
На жаль, не кожная старонка машынапісу добрай якасці, але змест п’есы, яе ідэя зразумелыя. Цэннасць экзэмпляру надаюць рукапісныя праўкі самога аўтара: рэмаркі, дадаткі, каментары, шмат выкрэсліванняў…
Другі цэнны дар з архіва пісьменніка – копія рукапіснага ГУЛАГаўскага сшытка (1938–1946), творы з якога раней цалкам нідзе не публікаваліся. У сшытак увайшлі вершы “Клятва”, “Ты даруй мне…”, “Міг забыцця”, “Ніколі не забуду”, “Хочацца жыць” і інш. Сярод іх ёсць верш “Пасланне”, які Андрэй Александровіч прысвяціў сваёй дачушцы Карыне. Вершы прасякнуты пачуццём шчымлівай тугі па Радзіме, па жыцці побач з роднымі людзьмі, напоўнены надзей на вяртанне да сваіх блізкіх.
Супрацоўнікі Нацыянальнай бібліятэкі ўдзячны Алегу Радаслававічу за копіі ўнікальных дакументаў, а таксама фотаздымкаў з асабістага архіва сям’і.
З матэрыяламі пра жыццё і творчасць Андрэя Александровіча можна азнаёміцца ў віртуальным раздзеле, створаным да 115-годдзя з дня яго нараджэння ў рамках праекта “На хвалі часу, у плыні жыцця”.
Не прапусціце нашы далейшыя навіны ў рубрыцы “Да 100-годдзя літаб’яднання «Маладняк»”.
Матэрыял пададзены інфармацыйна-аналітычным аддзелам.
