Нарадзілася Тамара Фёдараўна 27 чэрвеня 1941 года ў г.п. Мар’іна Горка Пухавіцкага раёна Мінскай вобласці. Як і многія дзеці вайны, рана страціла бацькоў: у 1944 годзе загінуў бацька, а ў 1949-м памерла мама. З васьмігадовага ўзросту дзяўчынка выхоўвалася ў Пухавіцкім дзіцячым доме, у 1959 годзе скончыла сярэднюю школу і паступіла ў Мінскі педагагічны інстытут імя М. Горкага.
Яшчэ на апошнім курсе была прынята на часовую пасаду бібліятэкара ў Дзяржаўную бібліятэку БССР імя У.І. Леніна. А атрымаўшы дыплом па спецыяльнасці “бібліятэказнаўства”, са жніўня 1963 года была пераведзена на пастаянную пасаду бібліятэкара аддзела апрацоўкі і каталогаў.
Праз тры гады дзяўчына перайшла ў сектар абавязковага экзэмпляра аддзела камплектавання, якому прысвяціла наступныя 30 гадоў, прайшоўшы свой прафесійны шлях ад бібліятэкара да загадчыцы сектара.
Тамара Фёдараўна займалася адборам няпрофільных выданняў у фонд бібліятэкі, вяла кантроль за паступленнем абавязковага экзэмпляра з саюзных рэспублік, першаснай апрацоўкай новых выданняў.
Як цудоўны прафесіянал сваёй справы добра ведала выдавецкую дзейнасць краіны і структуру кнігараспаўсюджвання, прафесійна валодала пытаннямі ўліку напаўняльнасці фонду, унесла шэраг канструктыўных прапаноў па ўдасканаленні тэхналагічных працэсаў працы ў аддзеле.
Т.Ф. Загрышава займалася і метадычнай працай, аказвала дапамогу бібліятэкам рэспублікі ў пытаннях камплектавання фондаў, была складальнікам метадычных рэкамендацый, аўтарам артыкулаў у зборніках навуковых прац.
Акрамя сваіх прафесійных абавязкаў, з задавальненнем прымала ўдзел у грамадскім жыцці бібліятэкі: неаднаразова абіралася ў камітэт камсамола, з’яўлялася членам рэвізійнай камісіі прафкама і камітэта таварыства Чырвонага Крыжа, уваходзіла ў склад санітарнай дружыны.
Адрозніваючыся вялікай працавітасцю, акуратнасцю і ініцыятыўнасцю, яна карысталася заслужаным аўтарытэтам і павагай сярод калег.
Працоўная дзейнасць Т.Ф. Загрышавай была адзначана дзвюма Ганаровымі граматамі Міністэрства культуры БССР, шэрагам падзяк ад адміністрацыі бібліятэкі, яе імя неаднаразова заносілася на Дошку гонару.
У 1996 годзе яна выйшла на пенсію, а праз 6 гадоў вярнулася і яшчэ на працягу года працавала на пасадзе бібліятэкара аддзела абслугоўвання, такім чынам прысвяціўшы 35 гадоў свайго прафесійнага жыцця Нацыянальнай бібліятэцы Беларусі.
Калектыў бібліятэкі віншуе Тамару Фёдараўну з гэтай цудоўнай датай і ад усяго сэрца жадае моцнага здароўя і даўгалецця, любві і ўвагі родных і блізкіх людзей.
Матэрыял падрыхтаваны навукова-даследчым аддзелам бібліятэказнаўства.
Аб ветэранах і супрацоўніках Нацыянальнай бібліятэкі Беларусі чытайце ў рубрыцы навін “Партрэты: гісторыя бібліятэкі ў асобах”.