Дата правядзення
Час правядзення
Месца правядзення
19 студзеня ў галерэі “Мабільная” (кальцавы калідор 3-га паверха) адбылося адкрыццё выстаўкі традыцыйнага кітайскага жывапісу “Поры года ў імператарскім садзе”, прымеркаванай да святкавання Новага года па кітайскім календары (22 студзеня).
У экспазіцыі прадстаўлены мастацкія работы, скруткі і вееры, выкананыя выкладчыцай курса кітайскага жывапісу “гунбі” навукова-адукацыйнага цэнтра “Яацянь” Наталляй Клепікавай і яе вучнямі. Наталля – член Маскоўскага клуба аматараў кітайскага жывапісу ў тэхніцы “гунбі”, навучалася ў прызнаных кітайскіх мастакоў Лі Сяаміна і Ту Чжуня, на курсах Лі Чжэ, Гун Сюэцына. Вучні Наталлі – мастакі-аматары Дзіяна Жолудзева, Юлія Віцень-Амос, Святлана Пятліцкая, Ала Казлова, Наталля Спаская.
Прадстаўленыя работы выкананы ў стылях “гунбі” і “магуфа”. Аўтары прытрымліваюцца традыцый класічнага кітайскага жывапісу і пераасэнсоўваюць старадаўнюю манеру ў кантэксце сучаснасці, дзеляцца сваім бачаннем, інтэрпрэтацыяй, успрыманнем старажытнага мастацтва.
Асноўныя тэмы работ – кветкі і птушкі, пейзаж. Сюжэты дэманструюць адзінства чалавека і прыроды, сувязь часоў і пакаленняў. Адметна, што кітайскі жывапіс глыбока сімвалічны, работы поўняцца таямнічым сэнсам, падтэкстам, якіх не зразумець без ведання знакавай сістэмы і культурных традыцый Кітая. Кожнай з работ уласціва цэласнасць ліній і формы, лаканічнасць і яснасць кампазіцыі, вытанчаная мова вобразаў, бясконцая гармонія, адухоўленасць і натуральнасць. Кожную з работ трэба “чытаць”.
На вернісажы гасцей чакае наступная праграма:
- экскурсія па экспазіцыі ад мастачкі Наталлі Клепікавай;
- відэа майстар-класа па рабоце ў традыцыйным кітайскім жывапісе;
- працэс стварэння Наталляй Клепікавай мастацкай работы ў стылі “гунбі” на рысавай паперы “Крылы цыкады” з выкарыстаннем арыгінальных кітайскіх пэндзляў і мінеральных фарбаў.
Экспазіцыя “Поры года ў імператарскім садзе” будзе працаваць да 25 красавіка 2023 года.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Глядзіце таксама рэпартаж тэлеканала "АНТ".
Матэрыял пададзены аддзелам сувязей з грамадскасцю.