ГалоўнаяМерапрыемствыПершы беларускі
Бунтар, правакатар, геній
Размова з адвакатам аб парадку іпатэчнага крэдытавання пры набыцці (будаўніцтве) жылля

Першы беларускі

Першы беларускі
Іншыя мерапрыемствы
20 кастрычніка – 30 снежня
Дата правядзення
10.00–21.00
Час правядзення
кальцавы калідор (3-ці паверх)
Месца правядзення

Да 100-годдзя з часу заснавання Беларускага дзяржаўнага ўніверсітэта на трэцім паверсе кальцавога калідора бібліятэкі арганізавана выстаўка “Першы беларускі”.

Вялікі юбілей адзначае сёлета адзін з найбуйнейшых культурных, адукацыйных, навуковых і інавацыйна-вытворчых цэнтраў краіны. 100 год таму, 30 кастрычніка 1921 г., адчыніў дзверы для сваіх першых студэнтаў Беларускі дзяржаўны ўніверсітэт (далей – БДУ).

Стварэнне ўніверсітэта ў Беларусі стала сапраўднай нацыянальнай падзеяй ХХ ст. На базе яго факультэтаў у 1930–1932 гг. былі заснаваны Мінскі медыцынскі інстытут, Мінскі педагагічны інстытут, Беларускі інстытут народнай гаспадаркі, Мінскі юрыдычны інстытут, шэраг галіновых ВНУ, якія ў 1933 г. увайшлі ў склад Беларускага політэхнічнага інстытута.

Напярэдадні Вялікай Айчыннай вайны на шасці факультэтах універсітэта вучыліся больш за дзве тысячы студэнтаў, прафесарска-выкладчыцкі склад налічваў 150 чалавек.

Выстаўка ўзгадвае раннія “старонкі жыцця” ўніверсітэта, калі закладваўся яго падмурак, з’явіліся першыя факультэты, у аўдыторыі прыйшлі першыя студэнты, у Мінск прыехала першая кагорта ўніверсітэцкіх прафесараў, пачалі выпускацца першыя студэнцкія газеты і часопісы, было створана навуковае таварыства БДУ і пачалі актыўна выдавацца разнастайныя навуковыя працы, з’явіліся першыя выпускнікі і першыя аспіранты. Экспануюцца арыгіналы архіўных дакументаў аб заснаванні ўніверсітэта 1919–1921 гг. Асаблівую ўвагу прыцягваюць аўтарскія навуковыя працы і манаграфіі 1-й чвэрці ХХ ст. першага выкладчыцкага складу БДУ, створаныя для першых навучэнцаў. Сярод іх кнігі з аўтографамі выкладчыкаў У.М. Іваноўскага, М.М. Піятуховіча, В.В. Якуніна.

Вылучаецца раздзел, прысвечаны асобе і дзейнасці першага рэктара БДУ Уладзіміра Іванавіча Пічэты, які адыграў вызначальную ролю ў станаўленні ўніверсітэта. Сярод спадчыны выбітнага гісторыка-славіста – аўтарская манаграфія 1917 г., пасля абароны якой ён атрымаў вучоную ступень магістра, а пазней – доктара гісторыі, і выданні з каштоўнымі аўтографамі. Дэманструюцца выданні з уласным аўтографам У.І. Пічэты і прысвячэннямі, адрасаванымі яму яго першым аспірантам Т.І. Забелам, прафесарам У.М. Ігнатоўскім, а таксама дырэктарам Дзяржаўнай бібліятэкі БССР І.Б. Сіманоўскім.

Аб агульнай гісторыі БДУ і нацыянальнай кніжнай скарбніцы нагадваюць выданні, адзначаныя пячаткай “Беларуская дзяржаўная і ўніверсітэцкая бібліятэка”, а таксама асабістыя дакументы супрацоўнікаў Дзяржаўнай бібліятэкі БССР, якія былі выпускнікамі Беларускага дзяржаўнага ўніверсітэта.

Зацікавяць і юбілейныя выданні розных гадоў, прысвечаныя БДУ. Сярод іх – сучасныя серыі “Белорусский государственный университет: 100 лет на благо Отечества” і “Памяць і слава”, якія на падставе арыгінальных дакументаў, успамінаў сучаснікаў і іншых матэрыялаў прадстаўляюць біяграфіі тых, хто стаяў ля вытокаў, засвойваў і развіваў новыя кірункі фундаментальных і прыкладных навуковых ведаў, фарміраваў навуковыя школы.


Выстаўка будзе працаваць з 20 кастрычніка да 30 снежня 2021 г.
Дата яе заканчэння можа быць зменена.

Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Запрашаем усіх жадаючых да прагляду экспазіцыі.

Тэлефон для даведак: (8 017) 293 29 80.

Матэрыял пададзены аддзелам галерэйна-выставачнай дзейнасці.

Мерапрыемствы

30 гадоў Садружнасці Незалежных Дзяржаў: вынікі і перспектывы

02.12.2021

З 2 снежня па 10 студзеня ў аддзеле абслугоўвання афіцыйнымі дакументамі (пам. 207) адкрыта тэматычная выстаўка “30 гадоў Садружнасці Незалежных Дзяржаў: вынікі і перспектывы”, прысвечаная 30-годдзю стварэння Садружнасці Незалежных Дзяржаў (СНД).

У пошуках радасці

03.12.2021

З 3 снежня па 10 студзеня ў зале дакументаў па мастацтве (пам. 306) праходзіць кніжна-ілюстрацыйная выстава “У пошуках радасці”, прысвечаная 160-годдзю з дня нараджэння рускага жывапісца, прадстаўніка рускага імпрэсіянізму Канстанціна Аляксеевіча Каровіна (1861–1939).

Навагодняе ператварэнне з імідж-стылістам Кацярынай Макар

03.12.2021

З набліжэннем Каляд і Новага года ў многіх з нас узнікаюць пытанні: як лепш сустрэць гэтыя чароўныя зімовыя святы, дзе і з кім іх адзначаць, якія стравы прыгатаваць? Немалаважную ролю адыгрывае і адзенне, у якім мы будзем сустракаць 2022 год.

Канцэрт піяніста Андрэя Кіранава

03.12.2021

У суботу, 11 снежня, малады беларускі піяніст, чытач Нацыянальнай бібліятэкі Андрэй Кіранаў выступіць з сольным канцэртам, прымеркаваным да 210-годдзя з дня нараджэння венгерскага кампазітара Ферэнца Ліста.



Бібліятэкарам