1 чэрвеня, у Міжнародны дзень абароны дзяцей, адбудзецца цікавае і яркае мерапрыемства – урачыстае адкрыццё выставы “Малады беларускі экслібрыс” і ўзнагароджанне пераможцаў конкурсу экслібрысаў.
Стварыць кніжны знак – няпростая задача, але юныя мастакі і кнігазнаўцы выдатна справіліся. На выставе будуць дэманстравацца больш за 170 творчых работ юных талентаў.
У конкурсе, прымеркаваным да 100-годдзя Нацыянальнай бібліятэкі Беларусі і 15-годдзя музея кнігі, узялі ўдзел дзеці ад 6 да 16 гадоў.
Партнёрам праекта стала кампанія OZ, якая падрыхтавала памятныя падарункі для пераможцаў.
Экслібрысы з’яўляюцца адначасова кнігаўладальніцкім знакам і творам мастацтва. Юныя мастакі прадумвалі сюжэты, ідэі і малявалі кніжныя знакі, перадаючы конкурсную тэму лаканічнымі сродкамі ў малым фармаце. Работы атрымаліся розныя: сур’ёзныя і вясёлыя, чорна-белыя і маляўнічыя. Усе яны неардынарныя і індывідуальныя, але, па ўмовах конкурсу, аўтарытэтнае журы мусіць выбраць лепшыя.
Урачыстае адкрыццё выставы і ўзнагароджанне пераможцаў адбудзецца ў музеі кнігі (пам. 347) а 15-й гадзіне.
Матэрыял пададзены навукова-даследчым аддзелам кнігазнаўства.