Выстаўка ў Ватыкане, якая адкрылася 11 лістапада, павінна праліць святло на гісторыю і сучасны стан Ватыканскай апостальскай бібліятэкі, славутай найбагацейшым зборам старажытных рукапісаў.
Ватыканская бібліятэка, заснаваная ў канцы XV стагоддзя Папам Мікалаем V, захоўвае больш за 1,5 млн кніжных выданняў, 75 тысяч рэдкіх рукапісаў, больш за 8 тысяч інкунабул, адну з найбагацейшых калекцый манет і медальёнаў. Тым не менш, бібліятэка ажыцццяўляе абмежаваны доступ да сваіх фондаў, у асноўным, для правядзення навукова-даследчай работы, таму карыстацца яе ўнікальнымі калекцыямі могуць толькі навукоўцы і спецыялісты. Аднак у рамках святкавання адкрыцця Ватыканскай апостальскай бібліятэкі пасля трохгадовай рэстаўрацыі, якая завяршылася ў верасні 2010 года, было вырашана арганізаваць асобную экспазіцыю, якая расказала б усім жадаючым пра багацці аднаго з найбуйнейшых у свеце кнігасховішчаў.
Экспазіцыя пад назвай "Знаёмства з Ватыканскай бібліятэкай: Гісторыя, даступная для будучыні" ("Understanding the Vatican Library: a History Open to the Future"), якая размясцілася ў залах павільёна Карла Вялікага побач з плошчай Святога Пятра, прапаноўвае наведвальнікам віртуальны тур па апостальскай бібліятэцы. Выстаўка ўключае ў сябе сем секцый, сярод якіх "Гісторыя бібліятэкі", "Рукапісы", "Карціны і малюнкі", "Друкаваныя выданні", "Нумізматыка" і "Архівы". У залах павільёна выстаўлены першыя біблейскія тэксты, найстаражытнейшыя манускрыпты ранніх стагоддзяў хрысціянства, кнігі-першадрукі, аўтографы вялікіх пісьменнікаў і навукоўцаў, рэдкія інкунабулы, ілюмінаваныя рукапісы, эскізы і гравюры знакамітых майстроў Сярэднявечча і эпохі Адраджэння, калекцыі манет і медалёў. Тут жа можна пазнаёміцца з першым друкаваным выданнем серыі гравюр Джавані Батыста Піранезі "Віды Рыма", аўтапартрэтам Джавані Ларэнца Берніні, паэтычнымі радкамі і эскізамі Мікеланджэла, работай Бацічэлі, якая паказвае сцэны з "Боскай камедыі". Жадаючыя змогуць дакрануцца да старонак рэпрадукцый высокай якасці некаторых выданняў перыяду Сярэднявечча і эпохі Рэнесанса.
Ужыванне мультымедыйных тэхналогій у рабоце экспазіцыі накіравана на эфектны паказ шырокай і разнастайнай калекцыі кніг, рукапісаў, выданняў бібліятэкі. Наведвальнікам экспазіцыі даступны аўдыятур на адной з пяці моў, які можа суправадзіць іх па тэматычных выставачных залах, шматлікія з якіх абсталяваны сучаснымі аўдыявізуальнымі эфектамі.
Выстаўка "Знаёмства з Ватыканскай бібліятэкай" будзе прымаць наведвальнікаў штодня да 31 студзеня 2011 года.
