На сайце тэатра пазначана, што спектакль паводле п'есы Янкі Купалы адбудзецца 23 і 24 верасня.
Раней меркавалася, што спектакль адновіцца ў чэрвені, але, відаць, умяшаўся каранавірус і давялося рэ-прэм'еру перанесці.
“Цяпер я прыдумаў іншую форму «Тутэйшых». Гэта зусім не падобна да таго, што было раней. Нават калі нічога не атрымаецца, то тэкст Купалы ўсё адно павінен гучаць з нашай сцэны. Для мяне гэта найлепшая яго пʼеса. Самая сурʼёзная, самая грунтоўная і самая сучасная. Бо мы не будзем памежжам паміж лацінскай культурай і візантыйскай”, – казаў у лютым мастацкі кіраўнік тэатра Мікалай Пінігін.
Пазначана, што сцэнаграфія і касцюмы – Кацярына Шымановіч, музыка – Андрэя Зубрыча.
“Тутэйшыя” – легендарны спектакль, што з трыумфам ішоў на сцэне Купалаўскага ў 1990-х і пачатку 2000-х. Упершыню быў пастаўлены 17 кастрычніка 1990 года. У 1992-м атрымаў Дзяржаўную прэмію.
У 1990-х Янку Здольніка іграў Аляксандр Лабуш, Мікіту Зносака – Віктар Манаеў, Аленку – Зоя Белахвосцік, Усходняга вучонага – Генадзь Давыдзька (потым – Аляксандр Падабед).
Таксама дырэктар тэатра Павел Латушка анансаваў хуткае вяртанне і іншай культавай п'есы Купалаўскага – “Ідылія”.
* Аўтар новай афішы – вядомы дызайнер Уладзімір Цэслер. На ёй шынель і тры гузікі: польскі, нямецкі і савецкі.
Крыніца: Наша ніва