9–13 лютага Нацыянальная бібліятэка Беларусі традыцыйна брала ўдзел у XVIII Мінскай міжнароднай кніжнай выстаўцы-кірмашы, якая праходзіла ў Нацыянальным выставачным цэнтры “БелЭкспа”.
Кніжная выстаўка ў Мінску з кожным годам карыстаецца ўсё большым аўтарытэтам, што пацвярджае пастаянны рост колькасці краін-удзельніц, а таксама наведвальнікаў. Сёлета свае стэнды прадставілі 605 экспанентаў з 23 краін. Ганаровым госцем выстаўкі выступіла Германія, якая пазнаёміла наведвальнікаў з кніжнымі навінкамі, творамі сучасных аўтараў і ў першую чаргу выданнямі на нямецкай мове.
На экспазіцыйна-выставачным стэндзе Нацыянальнай бібліятэкі Беларусі было прадстаўлена больш за 50 інфармацыйных выданняў. Наведвальнікі выстаўкі пазнаёміліся з друкаванай прадукцыяй (матэрыяламі канферэнцый, бібліяграфічнымі паказальнікамі, выданнямі, папулярызуючымі фонд бібліятэкі) і электроннымі выданнямі: базамі даных па гісторыі, культуры, мастацтве Беларусі, як бібліяграфічнымі, так і паўнатэкставымі.
10 лютага на галоўным стэндзе выставачнага цэнтра “БелЭкспа” адбылася прэзентацыя інфармацыйных рэсурсаў і паслуг Нацыянальнай бібліятэкі Беларусі. Таксама ў гэты дзень у рамках XVІІІ Мінскай міжнароднай кніжнай выстаўкі-кірмашу ў Нацыянальнай бібліятэцы Беларусі прайшло пасяджэнне круглага стала “Роля ўстаноў адукацыі, выдавецтваў і бібліятэк у развіцці чытання”.
11 лютага на стэндзе Нацыянальнай бібліятэкі Беларусі прайшла прэзентацыя інвестыцыйных праектаў у галіне захавання і папулярызацыі нацыянальнай кніжнай спадчыны.
У рамках правядзення выстаўкі Пасольства Федэратыўнай Рэспублікі Германія ў Рэспубліцы Беларусь і Інстытут імя Гётэ ў Мінску перадалі Нацыянальнай бібліятэцы Беларусі сертыфікат на атрыманне калекцыі літаратуры па экалагічнай архітэктуры “Солнечные перспективы. Зелёная архитектура сегодня!”
Нацыянальная бібліятэка Беларусі як рэспубліканскі інфармацыйны і сацыякультурны цэнтр паказала сябе выдатным выдаўцом і не саступала па якасці выдавецкай прадукцыі іншым удзельнікам выстаўкі-кірмашу.
За актыўны ўдзел і цікавую экспазіцыю Нацыянальная бібліятэка Беларусі ўзнагароджана дыпломам.
 |
 |
 |
 |
