10 лютага ў рамках XVІІІ Мінскай міжнароднай кніжнай выстаўкі-кірмашу ў Нацыянальнай бібліятэцы Беларусі адбылося пасяджэнне круглага стала “Роля ўстаноў адукацыі, выдавецтваў і бібліятэк у развіцці чытання”.
Арганізатарамі мерапрыемства выступілі Міністэрства культуры, Міністэрства інфармацыі і Нацыянальная бібліятэка Беларусі.
У рабоце круглага стала ўзялі ўдзел прадстаўнікі Міністэрства інфармацыі, Міністэрства культуры, Міністэрства адукацыі, Міністэрства сувязі і інфарматызацыі Рэспублікі Беларусь, РУП “Белпошта”, кіраўнікі і спецыялісты выдавецтваў, кнігагандлёвых арганізацый, пісьменнікі, кіраўнікі і спецыялісты бібліятэк.
Падчас пасяджэння круглага стала былі абмеркаваны пытанні актуальнай праблематыкі ўзаемадзеяння названых і іншых інстытутаў у сістэме “пісьменнік–чытач–бібліятэка”. Разгледжаны пытанні выдання і папулярызацыі беларускай літаратуры; механізмы фарміравання cпісаў сацыяльна значымых выданняў; падпіскі і распаўсюджвання перыядычных выданняў; выдання, распаўсюджвання і ўліку электронных кніг, камплектавання бібліятэчных фондаў электроннымі і аўдыявыданнямі, а таксама выданнямі для людзей з абмежаванымі фізічнымі магчымасцямі.
У рамках круглага стала адбылося ўзнагароджанне публічных бібліятэк за актыўную работу па камплектаванні фондаў бібліятэк сацыяльна значымай літаратурай у 2010 г. Міністэрствам інфармацыі Рэспублікі Беларусь, выдавецтвамі “Беларуская Энцыклапедыя імя П. Броўкі”, “Вышэйшая школа”, рэдакцыйна-выдавецкай установай “Мастацкая літаратура”.