У рабоце ўзялі ўдзел дэлегаты з 50 краін свету – кіраўнікі і спецыялісты нацыянальных бібліятэчных кансорцыумаў з краін Цэнтральнай, Усходняй і Паўднёва-Усходняй Еўропы, Афрыкі, Блізкага Усходу і Паўднёва-Усходняй Азіі, а таксама прадстаўнікі буйнейшых сусветных фірм – стваральнікаў электронных інфармацыйных рэсурсаў.

На цырымоніі адкрыцця асамблеі з прывітальнай прамовай выступіў дырэктар Нацыянальнай бібліятэкі Беларусі Р.С. Матульскі, які ўзначальвае Савет бібліятэк Беларусі па інфармацыйным узаемадзеянні.

Падчас пасяджэнняў асамблеі былі абмеркаваны пытанні пераадолення бар’ераў па выкарыстанні электронных рэсурсаў; рэалізацыі магчымасцей інтэграванага доступу да электронных інфармацыйных рэсурсаў, а таксама праблемы аўтарскага права ў кантэксце міжнароднага супрацоўніцтва бібліятэк.

Удзельнікі асамблеі азнаёміліся з вынікамі дзейнасці EIFL за мінулы год і абмеркавалі планы работы на перспектыву.

У першы дзень пасяджэнняў (26 чэрвеня) Ausra Vaskeviciene, кіраўнік адміністрацыі і кіраўнік праекта баз даных Літоўскага даследчага бібліятэчнага кансорцыума (супрацоўнік Нацыянальнай бібліятэкі Літвы імя Марцінаса Мажвідаса), выступіла з дакладам аб праблемах павышэння інфармацыйнага ўзроўню карыстальнікаў электронных рэсурсаў.

Вялікую цікавасць у ўдзельнікаў асамблеі выклікаў даклад Liam Wyatt з фонду Wikimedia, прысвечаны пытанням развіцця Вікіпедыі, арганізацыі супрацоўніцтва EIFL з супольнасцю Вікіпедыі і магчымасцям удзелу бібліятэк у яе стварэнні.

Спецыяльная сесія пад старшынствам Simon Ball, кіраўніка праграмы EIFL-FOSS, была прысвечана выкарыстанню бясплатнага праграмнага забеспячэння і праграм з адкрытым кодам для пошуку і арганізацыі доступу да электронных рэсурсаў.

На асамблеі былі заслуханы і абмеркаваны таксама даклады, прысвечаныя супрацоўніцтву EIFL з Сусветнай арганізацыяй інтэлектуальнай уласнасці, неабходнасці падтрымкі ініцыятывы стварэння электронных рэсурсаў адкрытага доступу.

28 чэрвеня адбыліся таксама пасяджэнні круглых сталоў, прысвечаных пераадоленню бар’ераў пры выкарыстанні электронных інфармацыйных рэсурсаў, праблемам аўтарскага права ў кантэксце дзейнасці бібліятэк і іншым пытанням, якія хвалююць бібліятэчнае супольніцтва.

Падчас пасяджэнняў асамблеі працавала выстаўка інфармацыйных прадуктаў і паслуг такіх вядучых выдавецтваў і агрэгатараў інфармацыйных рэсурсаў, як Burgundy Information Services Ltd; Cambridge University Press; EBRARY; Emerald Group Publishing Limited; GALE/Cengage; EBSCO; Institute of Physics Publishing; JSTOR; Nature Publishing Group; OECD; Oxford University Press; Royal Society Publishing; Sage Publications Ltd; Taylor & Francis; Wiley – Blackwell.

Прадстаўнікі нацыянальных бібліятэчных кансорцыумаў мелі магчымасць правесці перагаворы аб заключэнні дагавораў на пастаўку інфармацыйных рэсурсаў.

Усе ўдзельнікі асамблеі аднадушна адзначылі высокі прафесійны ўзровень мерапрыемства і выдатную арганізацыю работы.

Чытайце таксама:
Мерапрыемствы Генеральнай асамблеі кансорцыума EIFL
Генеральная асамблея кансорцыума EIFL