У 2019 годзе Рэспублiка Беларусь адзначае 65-годдзе ўступлення ў Арганізацыю Аб’яднаных Нацый па пытаннях адукацыі, навукі і культуры (ЮНЕСКА). Да гэтай даты Нацыянальная бібліятэка Беларусі пры інфармацыйнай падтрымцы Нацыянальнай камісіі па справах ЮНЕСКА падрыхтавала віртуальны праект “ЮНЕСКА і Беларусь: вехі супрацоўніцтва”.
ЮНЕСКА – важны партнёр Беларусі ў рашэнні задач у сацыякультурнай сферы, а таксама ўнікальная платформа для прапаганды дасягненняў у галіне культуры, навукі, адукацыі і інфармацыйных тэхналогій, папулярызацыі знешнепалітычных ініцыятыў дзяржавы і развіцця ўзаемавыгадных двухбаковых кантактаў.
Новы віртуальны праект бібліятэкі раскрывае найважнейшыя напрамкі супрацоўніцтва Рэспублікі Беларусь і ЮНЕСКА.
Праект складаецца з 10 раздзелаў, у кожным з якіх прадстаўлена тэкставая і візуальная інфармацыя па тэме, а таксама спісы літаратуры, якія ўключаюць кнігі, дысертацыі, артыкулы з часопісаў і зборнікаў, перыядычныя выданні, электронныя рэсурсы, аўдыя- і відэадакументы з фондаў НББ з указаннем шыфраў захоўвання, а таксама гіперспасылкі на поўныя тэксты дакументаў.
Праект змяшчае больш за 850 дакументаў на рускай, беларускай, англійскай і французскай мовах.
Прыводзяцца звесткі аб мерапрыемствах (кангрэсах, канферэнцыях, семінарах, круглых сталах) у галіне адукацыі, навукі, культуры і інфармацыі, якія праводзяцца ў Беларусі пад эгідай ЮНЕСКА, а таксама прадстаўлена інфармацыя аб дакументах і матэрыялах, выдадзеных пры падтрымцы ЮНЕСКА.
Праект будзе цікавы спецыялістам у галіне міжнароднага права, сусветнай палітыкі, міжнародных адносін, сацыёлагам, супрацоўнікам устаноў культуры і мастацтва, студэнтам і выкладчыкам, а таксама ўсім, хто цікавіцца дзейнасцю ЮНЕСКА і найважнейшымі напрамкамі супрацоўніцтва нашай краіны з гэтай арганізацыяй.
Матэрыял прадастаўлены аддзелам абслугоўвання афіцыйнымі дакументамі.
