13 сакавіка ў музеі кнігі адбылася творчая сустрэча з пісьменніцай-казачніцай Наталляй Бучынскай. Музейныя заняткі былі арганізаваны ў рамках праекта “Клуб кніжных прафесараў”.
Наталля Бучынская – аўтарка дзіцячых кніг “Прыгоды маленькай Машынкі” (2008), “Незабыўныя сустрэчы з авечкай Адэляй” (2013), “Атракцыёны для вадзянікоў” (2015), “Прынцэса Алівія і «жабіны вочкі»” (2019), “Рыцар Квых і «жабіны вочкі»” (2020). Яе казкі і апавяданні друкуюцца ў часопісах “Верасень”, “Бярозка”, “Вясёлка”, “Буся”, “Качели”, гучаць на радыёканале “Культура”.
Пісьменніца распавядае пра сваіх герояў, як пра найлепшых сяброў, і ставіцца да іх з павагай. Напрыклад, авечка Адэля дапамагае казачніцы пісаць кнігі і дае важныя парады. Фантазія пісьменніцы дазваляе чытачам зазірнуць у чароўны падводны свет, дзе жывуць казачныя істоты і адбываюцца незвычайныя падзеі. Цікава было пазнаёміцца з вадзянікамі, якія стваралі ў возеры Доўгім атракцыёны, бабрынай сямейкай, што шануе Чырвоную кнігу Беларусі.
У дзіцячых кнігах, дзе патрэбна прывабіць увагу яркімі малюнкамі, мастакамі створаны запамінальныя вобразы казачных герояў. “Кніжныя прафесары” пазнаёміліся з мастацкім афармленнем кніг і самі сталі кніжнымі дызайнерамі. Творчае заданне заключалася ў незвычайным размяшчэнні тэксту на старонках кніг.
Наталля Бучынская наведала выставу “ILLUSTRATIO. Разнастайнасць тэхнік ілюстравання”, на якой у тым ліку экспануецца яе кніга “Атракцыёны для вадзянікоў”.
Матэрыял пададзены навукова-даследчым аддзелам кнігазнаўства.
