11 снежня Нацыянальная бібліятэка Беларусі падтрымала ініцыятыву ашмянскай сярэдняй школы № 3 і прыняла ўдзел у навучальна-асветніцкім семінары, прысвечаным 500-годдзю беларускага кнігадрукавання.
Дырэктар школы Уладзімір Віктаравіч Войнюш і намеснік дырэктара па выхаваўчай рабоце Данута Францаўна Янцэвіч падкрэслілі ў сваіх выступленнях, што мэта семінара – пашырэнне ведаў вучняў і настаўнікаў пра жыццё і творчасць Францыска Скарыны, папулярызацыя беларускай кніжнай спадчыны, стымуляванне навучальнай актыўнасці і патрыятычнае выхаванне навучэнцаў.
Вучні прадставілі творчыя праекты, прысвечаныя 500-гадоваму юбілею беларускага кнігадрукавання. Адзін з іх – “Мінулае памятаем, будучае ствараем” – пераможца рэспубліканскага конкурсу “Ты ў эфіры”. Аўтар праекта – Юлія Буйвід, кіраўнік – Юлія Анатольеўна Вайда.
Таццяна Андрэеўна Сапега, загадчык сектара навукова-даследчага аддзела кнігазнаўства Нацыянальнай бібліятэкі, правяла культурна-асветніцкія заняткі, прысвечаныя беларускаму першадрукару.
Падчас семінара ў школе была арганізавана кніжная выстаўка, сярод экспанатаў якой часова былі прадстаўлены дакументы з фонду Нацыянальнай бібліятэкі Беларусі.
 |
 |
 |
 |
 |
 |
