12–13 снежня супрацоўнікі Нацыянальнай бібліятэкі прынялі ўдзел у II З’ездзе вучоных Беларусі.
У першы дзень работы з’езда на базе навуковых арганізацый і ўніверсітэтаў адбылося дзевяць тэматычных секцыйных пасяджэнняў, прысвечаных асноўным кірункам развіцця айчыннай навукі і міжнароднаму супрацоўніцтву. Форум сабраў дэлегатаў з усіх абласцей краіны, вядомых вучоных СНД і сусветных навукова-даследчых цэнтраў.
Сёння, 13 снежня, у Палацы Рэспублікі адбылося пленарнае пасяджэнне з’езда з удзелам Прэзідэнта Рэспублікі Беларусь Аляксандра Лукашэнкі. Падчас пасяджэння былі падведзены вынікі Года навукі ў Беларусі, а таксама вызначаны задачы і прыярытэтныя напрамкі развіцця навукі на бліжэйшыя 20 гадоў.
У пленарным пасяджэнні прынялі ўдзел дырэктар Нацыянальнай бібліятэкі Беларусі Раман Матульскі, намеснік дырэктара па навуковай рабоце і выдавецкай дзейнасці Аляксандр Суша і намеснік дырэктара па інфармацыйных рэсурсах Таццяна Кузьмініч.
У холе Палаца Рэспублікі была арганізавана рэспубліканская выстаўка “Навука і інавацыі Рэспублікі Беларусь”, якая складаецца з дзвюх тэматычных выставак. У экспазіцыі, прысвечанай 500-годдзю беларускага і ўсходнеславянскага кнігадрукавання, Нацыянальная бібліятэка Беларусі прадставіла ўвазе ўдзельнікаў форуму шматтомнае факсіміле “Кніжная спадчына Францыска Скарыны”.
Міжнародны навуковы выдавецкі праект па факсімільным узнаўленні кніжнай спадчыны Францыска Скарыны рэалізоўваўся сумесна з Банкам БелВЭБ на працягу пяці гадоў (2013–2017 гг.). Унікальнае выданне – вынік сур’ёзнай навуковай працы – стала прыкладам паспяховага міжнароднага супрацоўніцтва ў пытаннях захаванасці нацыянальнай культурнай і гістарычнай спадчыны.
|
|
|
|
