28 верасня ў бібліятэцы ў межах святкавання 400-годдзя “Буквара” адбылося прысвячэння ў першакласнікі вучняў 1 “З” класа мінскай гімназіі № 43.
Ініцыятыву менавіта так арганізаваць важны для дзяцей дзень праявіла іх настаўніца Яўгенія Ігараўна Сырыца.
У сценах галоўнай бібліятэкі краіны дзеткі атрымалі сваю першую кнігу для навучання. Першакласнікі даведаліся, што першай у свеце кнізе пад назвай "Буквар" сёлета спаўняецца 400 гадоў і што да яе мелі адносіны нашы продкі. Сёння з такой кнігі пачынаецца дарога ў свет ведаў дзетак не толькі ў Беларусі, але і ў многіх краінах свету, а слова "буквар" увайшло ў сучасныя беларускую, рускую, украінскую і іншыя мовы.
Першакласнікі наведалі выстаўку “Беларусь і Біблія”, дзе ўбачылі старажытныя помнікі рукапіснай і друкаванай кніжнай культуры. Амерыканская даследчыца Дэніс Элен Кэрал расказала пра школьнае жыццё ў старажытнасці і падарыла кожнаму вучню гусінае пяро.
На экспазіцыі дзеткі пазнаёміліся з кнігамі беларускага першадрукара і былі ўражаны факсімільным выданнем “Кніжная спадчына Францыска Скарыны”. Школьнікі даведаліся, што ў старажытныя часы Біблія была адначасова навучальнай кнігай для авалодання ведамі па граматыцы, гісторыі, філасофіі, логіцы, рыторыцы, музыцы, арыфметыцы, астраноміі.
Напрыканцы маленькія госці падарылі арганізатарам мерапрыемства аплікацыю, прысвечаную любімай Нацыянальнай бібліятэцы Беларусі.
