30 верасня ўдзельнікі “Клуба кніжных прафесараў” сабраліся, каб разам пабачыць унікальныя артэфакты і пазнаёміцца з гісторыяй стварэння, распаўсюджвання і захавання самай вядомай і ключавой кнігі ў гісторыі чалавецтва – Бібліі.
Заняткі праходзілі на міжнароднай выстаўцы “Беларусь і Біблія”, а правялі іх куратары выставачнага праекта з ЗША, даследчыкі манускрыптаў Скот Кэрал і Дэніс Элен Кэрал.
У музейнай экспазіцыі маленькія “прафесары” змаглі пабачыць сапраўдныя старажытныя рукапісы на папірусе і пергаменце, калекцыю тораў, першыя друкаваныя кнігі, пераклады біблейскіх тэкстаў на беларускую і еўрапейскія мовы, прыклады мастацкага афармлення Святога Пісання лепшымі майстрамі XVІ–XXІ стст.
Уражлівым стаў момант, калі дзеці трымалі ў руках і разглядалі пергаментны сувой, якому 300 гадоў!
