5 мая 2019 г. музычная грамадскасць усяго свету, а таксама аматары гісторыі і культуры Беларусі, Польшчы, Літвы, Расіі, многіх іншых краін свету будуць адзначаць знамянальную дату: 200-годдзе з дня нараджэння выдатнага кампазітара, дырыжора, музычна-грамадскага дзеяча Станіслава Манюшкі (1819–1872).
Віртуальны праект “Станіслаў Манюшка. Музычны рамантык з Міншчыны”, прэзентацыя якога адбылася 24 красавіка, – гэта ўклад Нацыянальнай бібліятэкі Беларусі ў святкаванне юбілею славутага земляка, здзейснены ў рамках рэспубліканскага плана мерапрыемстваў да юбілею С. Манюшкі, уключанага ў спіс памятных дат ЮНЕСКА на 2019 год.
Упершыню ў межах аднаго інфармацыйнага рэсурсу можна глыбей пазнаёміцца з асобай С. Манюшкі, яго творчай спадчынай, даведацца больш пра пастаноўкі яго твораў на беларускай сцэне. Асобная частка праекта прысвечана ўшанаванню памяці кампазітара ў Беларусі.
Віртуальны праект уключае вялікі аб’ем інфармацыі з фондаў Нацыянальнай бібліятэкі – бібліяграфічнай, паўнатэкставай, фактаграфічнай, выяўленчай і аўдыявізуальнай. У праекце прадстаўлены таксама і каштоўныя матэрыялы з Нацыянальнага гістарычнага музея Рэспублікі Беларусь, Дзяржаўнага музея гісторыі тэатральнай і музычнай культуры Рэспублікі Беларусь, Беларускай дзяржаўнай акадэміі музыкі і Цэнтральнай навуковай бібліятэкі НАН Беларусі.
Першы раздзел знаёміць карыстальнікаў з біяграфіяй кампазітара: яго паходжаннем, дзяцінствам, перыядам вучобы і творчага станаўлення. Інфармацыя багата аздоблена шматлікімі ілюстрацыямі, якія даюць прадстаўленне пра сям’ю кампазітара і месцы, звязаныя з яго жыццём і дзейнасцю.
Другі раздзел расказвае пра шматгранную музычную спадчыну С. Манюшкі, жанры, да якіх ён звяртаўся, творчае супрацоўніцтва з выбітнымі дзеячамі беларускай культуры – В. Дуніным-Марцінкевічам, Я. Чачотам, У. Сыракомлем, А. Міцкевічам і інш. Раздзел аздабляюць аўдыяфрагменты твораў С. Манюшкі ў выкананні сучасных музыкантаў В. Скорабагатава, Л. Лют, Ю. Гарадзецкага і нотныя дакументы другой паловы XIX – пачатку XX ст.
У трэцім раздзеле змешчаны матэрыял пра пастаноўкі твораў С. Манюшкі на беларускай сцэне, які праілюстраваны фотаздымкамі са спектакляў і канцэртаў і эскізамі касцюмаў Яўгена Ждана да оперы “Галька”.
Чацвёрты раздзел прысвечаны ўшанаванню памяці кампазітара на радзіме і ўключае надзвычай багаты фактаграфічны і ілюстрацыйны матэрыял пра помнікі і мемарыяльныя дошкі, увасабленне вобраза Манюшкі ў творчасці сучасных беларускіх мастакоў, музейна-выставачную дзейнасць, музычна-тэатралізаваныя мерапрыемствы, а таксама музычныя і літаратурныя прысвячэнні кампазітару.
Бібліяграфічныя звесткі пра жыццёвы і творчы шлях С. Манюшкі прадстаўлены ў пятым раздзеле ў храналагічным і алфавітным парадку.
Па самых розных крыніцах бібліяграфічнай інфармацыі – электронны каталог НББ, бібліяграфічны паказальнік “Летапіс друку Беларусі” (з 1924 г. да нашых дзён), база даных “Культура і мастацтва Беларусі” і інш. – складальнікі выявілі, прааналізавалі і апрацавалі звыш 700 дакументаў, 50 з іх маюць спасылкі на алічбаваныя копіі.
Спадзяёмся, што праект “Станіслаў Манюшка. Музычны рамантык з Міншчыны” – не толькі даніна пашаны нашаму таленавітаму земляку, але і карысная і пазнавальная крыніца інфармацыі для ўсіх, хто цікавіцца нацыянальнай музычнай культурай, – аматараў, музыказнаўцаў і даследчыкаў творчасці кампазітара.
З віртуальным праектам можна азнаёміцца на беларускай мове. У хуткім часе будуць прадстаўлены руская і англійская версіі праекта.
Тэлефон для даведак: (8 017) 293 27 43.
Матэрыял прадастаўлены інфармацыйна-аналітычным аддзелам.
