З 19 снежня па 19 студзеня ў Нацыянальнай бібліятэцы Беларусі праходзіць выстаўка “Перачытаць Міцкевіча ўсяго...”, прымеркаваная да 215-годдзя з дня нараджэння Адама Міцкевіча.
Творчасць вялікага паэта Адама Міцкевіча (1798–1855) стала здабыткам сусветнай культуры, прадметам вывучэння і пастаяннай цікавасці прадстаўнікоў многіх краін. Не выпадкова іна Беларусі, радзіме паэта, зацікаўленасць да яго жыцця і творчасці мае даўнія традыцыі і з цягам часу не згасае.
Закаханы ў край сваёй маладосці Міцкевіч праславіў яго цудоўнай паэзіяй. Навагрудак, Вільня, Мінск, Свіцязь, Нёман, Вілейка і многія іншыя беларускія назвы часта гучалі ў яго творах. Не адну старонку сваёй творчасці прысвяціў паэт апісанню жыцця беларускага народа.
“Перачытаць Міцкевіча ўсяго...” заклікае кніжна-ілюстрацыйная выстаўка. Акрамя польскамоўнага Збору твораў у 17 тамах і рускамоўнага пяцітомніка, экспазіцыя ўключае зборы выбраных твораў, тэматычныя падборкі вершаў, балад, санетаў і баек, а таксама публіцыстыку. Асобнае месца займаюць выданні розных гадоў яго бессмяротных паэм “Пан Тадэвуш”, “Гражына”, “Конрад Валенрод”, “Дзяды”. Літаратура прадстаўлена на беларускай, польскай, рускай, літоўскай, украінскай, азербайджанскай мовах. Найкаштоўнейшым перакладам паэзіі Адама Міцкевіча ў гісторыі беларускай літаратуры безумоўна з’яўляецца праца першага перакладчыка яго твораў В. Дуніна-Марцінкевіча. На беларускую мову творчасць паэта таксама перакладалі Я. Колас, Я. Семяжон, П. Бітэль, М. Танк, А. Зарыцкі, К. Цвірка і інш.
У шэрагу кніг апавядаецца пра сучаснікаў, сяброў і муз паэта. Частка экспазіцыі прысвечана даследаванням жыцця і творчасці Адама Міцкевіча, у тым ліку яго сувязям з беларускім краем, захаванню памяці аб нашым слаўным суайчынніку.
На выстаўцы прадстаўлена каля 300 дакументаў, сярод якіх выданні ХІХ–ХХІ стст., шматлікія партрэты Адама Міцкевіча і ілюстрацыі да яго твораў такіх вядомых мастакоў, як В. Ваньковіч, М. Андрыёлі, Я. Матэйка, Я. Тысевіч, В. Шаранговіч і інш.
Тэлефон для даведак: (8 017) 293 29 80.
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
