31 сакавіка 2009 года ў Круглай зале Нацыянальнай бібліятэкі Беларусі адбылося шостае пасяджэнне Савета дзелавога супрацоўніцтва Рэспублікі Беларусь і Ніжагародскай вобласці Расійскай Федэрацыі.
На пасяджэнні былі разгледжаны наступныя пытанні: стан і перспектывы гандлёва-эканамічных адносін Рэспублікі Беларусь з Ніжагародскай вобласцю Расійскай Федэрацыі; супрацоўніцтва ў сферы прамысловай кааперацыі машынабудаўнічых комплексаў; супрацоўніцтва ў сферы паставак аўтамабільнай, пасажырскай, сельскагаспадарчай і дарожна-будаўнічай тэхнікі, стварэння дылерскіх і сэрвісных цэнтраў; супрацоўніцтва ў сферы сельскай гаспадаркі, прымянення найноўшых тэхналогій у раслінаводстве, жывёлагадоўлі, паставак прадукцыі сельгасперапрацоўкі і харчовых тавараў; ход рэалізацыі праектаў па стварэнні гандлёва-лагістычнага цэнтра на тэрыторыі Ніжагародскай вобласці, развіцці выставачна-кірмашовай дзейнасці. Таксама быў разгледжаны план мерапрыемстваў на 2009 год па выкананні Праграмы развіцця супрацоўніцтва паміж Ніжагародскай вобласцю і Рэспублікай Беларусь на 2006–2010 гады.
У ходзе пасяджэння паміж першым намеснікам прэм’ер-міністра Рэспублікі Беларусь У.І. Сямашкам і губернатарам Ніжагародскай вобласці Расійскай Федэрацыі В.П. Шанцавым быў падпісаны пратакол шостага пасяджэння Савета дзелавога супрацоўніцтва Рэспублікі Беларусь і Ніжагародскай вобласці Расійскай Федэрацыі.
У рамках мерапрыемства для гасцей і ўдзельнікаў сустрэчы была праведзена экскурсія па будынку Нацыянальнай бібліятэкі Беларусі, па заканчэнні якой у музеі кнігі губернатар зрабіў памятны запіс у Кнізе ганаровых гасцей.