8 лютага ў рамках пасяджэнняў “Клуба кніжных прафесараў” адбылася ўнікальная сустрэча з паэткай Анхелай Эспіносай.
Анхела Эспіноса – іспанка, якая выдатна валодае многімі мовамі, вывучае беларускую мову і літаратуру, піша вершы на беларускай мове і атрымлівае літаратурныя ўзнагароды ў Беларусі. Аўтар зборнікаў вершаў і прозы "Раяль ля мора" (2015), “Памяць пра будучыню” (2015), "Pomme de ciel" (2017) і "Колер крылаў. Паэзія і проза" (2019). Творы Анхелы друкаваліся ў часопісах "Маладосць", "Дзеяслоў", "Полымя" і інш.
Анхела – незвычайны чалавек, які жыве ў розных культурных светах. Яна не проста вучыць мову, але паглыбляецца ў культурную прастору. Перад сабой дзеці бачылі абаяльную іспанку, а слухаючы яе развагі і чытаючы вершы, уваходзілі ў свет беларускай свядомасці. Анхела абрала беларускую ў якасці мовы творчасці. Спроба знайсці сваю лірычную мову ў няроднай сістэме, эксперыменты з метафарамі, гукамі, стылем – гэта яе паспяховы шлях да авалодання мовай.
Сустрэча мела фармат дыялогу, насычанага пытаннямі пра кнігі, мовы і літаратуры. Безумоўна, гучалі вершы Анхелы, прычым большасць з іх чыталі самі дзеці! Госця распавяла аб сваім досведзе паліглота і здзівіла дзяцей і дарослых поспехамі. На пытанні “кніжных прафесараў”, ці складана вывучаць мовы і як доўга трэба працаваць над сабой, Анхела натхняла іх, кажучы: “Гэта лёгка і цікава! У вас усё атрымаецца!”
У 2017 годзе Анхела пераклала на іспанскую мову вершы Максіма Багдановіча, якія ўвайшлі ў выдадзены ў Мадрыдзе зборнік “Згукі маёй Бацькаўшчыны”. Удзельнікі мерапрыемства чыталі вершы са зборніка на беларускай мове, а Анхела ў адказ – на іспанскай. Госця натхніла дзяцей на вывучэнне іспанскай мовы, бо “Пагоня” на іспанскай гучыць так прыгожа!
На пытанне, якую з асабістых падзей Анхела лічыць найбольш важнай, яна адзначыла паспяховую абарону доктарскай дысертацыі па беларускай літаратуры. Абарона адбылася ў верасні 2019 года на філалагічным факультэце Універсітэта Камплютэнсэ ў Мадрыдзе.
“Кніжныя прафесары” атрымалі на памяць аб беларуска-іспанскай сустрэчы аўтографы знакамітай госці. Анхела падпісала таксама свае кнігі для чытачоў Нацыянальнай бібліятэкі Беларусі.
Матэрыял прадастаўлены навукова-даследчым аддзелам кнігазнаўства.