22–23 кастрычніка ў Нацыянальнай бібліятэцы Беларусі адбылася Міжнародная канферэнцыя “Эпоха Адраджэння ў Беларусі”, прысвечаная гісторыі і культуры Італіі, уплыву італьянскага Адраджэння на Беларусь.
Арганізатарамі канферэнцыі выступілі Пасольства Італьянскай Рэспублікі ў Рэспубліцы Беларусь і Нацыянальная бібліятэка Беларусі.
У навуковым форуме прынялі ўдзел спецыялісты ў галіне гісторыі, літаратуры, мастацтва, архітэктуры і горадабудаўніцтва з Беларусі, Італіі, Польшчы, Літвы. Канферэнцыя прайшла пры ўдзеле Надзвычайнага і Паўнамоцнага Пасла Італьянскай Рэспублікі ў Рэспубліцы Беларусь Джуліо Прыджоні, Надзвычайнага і Паўнамоцнага Пасла Рэспублікі Польшча ў Рэспубліцы Беларусь Генрыка Літвіна, Надзвычайнага і Паўнамоцнага Пасла Літоўскай Рэспублікі ў Рэспубліцы Беларусь Эдмінаса Багдонаса. Беларусь на форуме прадставілі вучоныя і спецыялісты найбуйнейшых беларускіх універсітэтаў і навукова-даследчых арганізацый: Нацыянальнай бібліятэкі і Нацыянальнай акадэміі навук, Беларускага дзяржаўнага універсітэта і інш.
Тэматыка выступленняў удзельнікаў канферэнцыі была наступнай: ацэнка асобы і дзейнасці Боны Сфорцы сярод сучаснікаў і нашчадкаў, а таксама ўплыў італьянскага Адраджэння на палітычнае, эканамічнае і культурнае жыццё Вялікага княства Літоўскага, спадчына эпохі Адраджэння ў літаратуры, мастацтве, архітэктуры і горадабудаўніцтве.
 |
 |
 |
