11 сакавіка а 17-й гадзіне ў галерэі “Лабірынт” адбудзецца літаратурна-музычная вечарына “Мелодыя сэрца – мелодыя святла”, прысвечаная 200-годдзю з дня нараджэння сусветна вядомага польскага кампазітара Фрыдэрыка Шапэна (1810–1849).
Увесь культурны свет шырока святкуе двухсотгоддзе заснавальніка польскай класічнай музыкі, кампазітара і піяніста. ЮНЕСКА ўнесла юбілей кампазітара ў спіс памятных дат і абвясціла 2010 г. Годам Шапэна.
Нацыянальная бібліятэка Беларусі таксама прыняла ўдзел у агульнасусветным працэсе святкавання гэтага юбілею і прадстаўляе ўласны культурны праект – літаратурна-музычную вечарыну “Мелодыя сэрца – мелодыя святла”. Адметнай рысай мерапрыемства стане дэманстрацыя гледачу цікавай і багатай калекцыі дакументаў пра жыццё і творчасць Фрыдэрыка Шапэна з фондаў бібліятэкі.
У рамках літаратурна-музычнай вечарыны адбудзецца прэзентацыя кніжна-ілюстрацыйнай выстаўкі “Паэт фартэпіяна”, на якой будзе прадстаўлена разгорнутая юбілейная экспазіцыя: кнігі, ноты, гуказапісы, альбомы, выяўленчы матэрыял, камплекты паштовак, электронныя выданні.
Адначасова адкрыецца і мастацкая выстаўка “Мелодыя святла”, на якой свае работы, прысвечаныя вялікаму музыканту, прадставяць акварэлісты, жывапісцы, майстры фота і графікі.
Гасцей чакае канцэрт з удзелам піяніста-віртуоза Аляксандра Палякова, акцёра і музыканта Міхаіла Зуя, студэнтаў Беларускай дзяржаўнай акадэміі мастацтваў, Беларускай дзяржаўнай акадэміі музыкі, Гімназіі-каледжа мастацтваў імя І.А. Ахрэмчыка, вучняў Дзіцячай музычнай школы № 3 імя Ф. Шапэна, якія выканаюць творы вядомага польскага кампазітара – вальсы, мазуркі, паланэзы, накцюрны.
Тэлефоны для даведак: 293-29-80, 293-27-67.
Е-mail: pr@nlb.by
