З 10 па 30 сакавіка ў Нацыянальнай бібліятэцы Беларусі (2-гі паверх, кальцавы калідор), праходзіць юбілейная кніжная выстаўка “Не пакідайце ж мовы нашай беларускай…”, прысвечаная 170-годдзю з дня нараджэння Францішка Багушэвіча (1840–1900).
Францішак Бенядзікт Багушэвіч увайшоў у гісторыю беларускай літаратуры як пісьменнік-дэмакрат, заснавальнік крытычнага рэалізму, паэт, публіцыст, празаік і перакладчык, ён значна ўзбагаціў нашу літаратуру жанрава. З імем Багушэвіча даследчыкі звязваюць развіццё і станаўленне беларускай літаратурнай мовы, а таксама нараджэнне беларускай байкі.
З нагоды юбілею Ф. Багушэвіча Нацыянальная бібліятэка Беларусі прапануе кніжную выстаўку, на якой прадстаўлена больш за 100 выданняў, прысвечаных яго жыццю і шматграннаму таленту.
Першы раздзел выстаўкі “Творчая спадчына” ўключае два самыя вядомыя зборнікі Ф. Багушэвіча: ксеракопіі прыжыццёвых выданняў “Dudka вialaruskaja” (1891 г.) і “Smyk вialaruski” (1894 г.). Таксама прадстаўлены факсімільныя выданні надрукаваных лацініцай першай кнігі Мацея Бурачка “Dudka вialaruskaja” (1891 г.), арыгінальны экзэмпляр якой захоўваецца ў бібліятэцы Акадэміі навук Літвы, і апавядання “Tralalonaczka” (1892 г.), адзіны вядомы арыгінал якога знаходзіцца ў бібліятэцы Ягелонскага універсітэта (г. Кракаў); арыгіналы выданняў Ф. Багушэвіча “Песні” (1904 г.), “Dudka вialaruskaja” (1914 г.), “Смык беларускі” (1922 г.); выбраныя творы розных гадоў выдання, пераклады твораў паэта на іншыя мовы: рускую, украінскую, англійскую, польскую, сербскую.
Сваё пачэснае месца ў экспазіцыі займае мультымедыйнае электроннае выданне, прысвечанае класіку беларускай літаратуры, якое падрыхтавала Нацыянальная бібліятэка Беларусі да Дня беларускага пісьменства, што прайшоў у 2009 г. у Смаргоні.
Другі раздзел “Жыццёвы шлях” прысвечаны старонкам біяграфіі Багушэвіча, яго сябрам і аднадумцам, а таксама асяроддзю паэта. Экспазіцыя ўключае шэраг кніг У. Содаля, вядомага даследчыка жыцця і творчай спадчыны “беларускага дудара”.
Шмат вядомых сучасных паэтаў выказваюць павагу і ўдзячнасць Ф. Багушэвічу ў сваіх вершах. Гэтыя вершы, звесткі аб памятных мясцінах, якія звязаны з паэтам, можна знайці ў раздзеле “Помнім, шануем, ганарымся...”.
Кантактныя тэлефоны: 293-28-86, 293-29-80.
Увага! У чытальных залах арганізаваны доступ да поўных спісаў літаратуры, што прадстаўлена на ўсіх кніжных выстаўках, якія праводзяцца ў бібліятэцы.