З 12 па 16 лістапада ў г. Хімкі (Маскоўская вобл.) прайшла XVI Міжнародная канферэнцыя і выстаўка “LIBCOM: Інфармацыйныя тэхналогіі, камп’ютарныя сістэмы і выдавецкая прадукцыя для бібліятэк”.
Галоўны арганізатар мерапрыемства – Дзяржаўная публічная навукова-тэхнічная бібліятэка Расіі.
У мерапрыемстве ўдзельнічалі каля 400 чалавек: прадстаўнікі бібліятэчнай грамадскасці Абхазіі, Азербайджана, Беларусі, Казахстана, Расіі, Украіны; прадстаўнікі вышэйшых навучальных устаноў, Міністэрства культуры Расійскай Федэрацыі, навучальных цэнтраў, бібліятэчнай асацыяцыі, а таксама кнігавыдавецкія кампаніі.
У рабоце канферэнцыі прыняла ўдзел і выступіла з дакладам “Карпаратыўныя рэсурсы і сэрвісы Нацыянальнай бібліятэкі Беларусі: тэхналагічныя аспекты фарміравання і выкарыстання” загадчыца аддзела карпаратыўнага ўзаемадзеяння Нацыянальнай бібліятэкі Беларусі Крамязная С.А.
На канферэнцыі абмяркоўваліся стан і перспектывы развіцця новых інфармацыйных, камп’ютарных і інтэрнэт-тэхналогій у бібліятэчнай практыцы, сістэмная і сеткавая інтэграцыя інфармацыйных і бібліятэчных рэсурсаў, інавацыі ў сучасных адукацыйных тэхналогіях, прававыя аспекты дзейнасці бібліятэк і вытворцаў інфармацыі, электронныя бібліятэкі і электронныя інфармацыйныя рэсурсы.
У рамках канферэнцыі праходзіла спецыялізаваная выстаўка па асноўных тэматычных кірунках: новыя камп’ютарныя і інтэрнэт-тэхналогіі ў інфармацыйнай і бібліятэчнай справе, электронная інфармацыя і электронныя рэсурсы, выдавецкая прадукцыя, бібліятэчнае абсталяванне і матэрыялы, адукацыйныя тэхналогіі.