5 чэрвеня на экскурсіі, прымеркаванай да 100-годдзя пагранічнай службы Беларусі, у бібліятэцы пабывала дэлегацыя аб’яднанай прафсаюзнай арганізацыі органаў пагранічнай службы Беларускага прафесійнага саюза работнікаў дзяржаўных і іншых устаноў.
У сваё прафесійнае свята пагранічнікі падрабязна азнаёміліся з магчымасцямі бібліятэкі як інфармацыйнага і сацыякультурнага цэнтра: вывучылі архітэктурныя асаблівасці бібліятэчнага будынка, яго мастацкае афармленне, сістэму заказу, дастаўкі і выдачы літаратуры, пабывалі ў Круглай зале Прэзідэнт-цэнтра, музеі кнігі і на выстаўках, прысвечаных Году малой радзімы.
Асаблівае месца ў працэсе знаёмства з бібліятэкай заняло азнаямленне з цыклам вучэбна-пазнавальных экскурсій “Славутыя імёны Бацькаўшчыны”, прысвечаных жыццю і творчасці нашых вядомых землякоў. Гасцям быў прадстаўлены кніжны агляд па творчасці Якуба Коласа, Янкі Купалы, Максіма Багдановіча, Янкі Маўра, Кандрата Крапівы, Марка Шагала, а таксама падборка літаратуры пра месцы на карце Беларусі, звязаныя з жыццём гэтых вядомых людзей.
Акрамя таго, экскурсанты прагледзелі некалькі серый анімацыйнага фільма “Аповесць мінулых гадоў” вытворчасці кінастудыі “Беларусьфільм”, прысвечанага паходжанню гербаў гарадоў Беларусі. Кожны атрымаў магчымасць даведацца больш пра гербы населеных пунктаў менавіта свайго рэгіёну. У рамках святкавання 135-годдзя з дня нараджэння Янкі Маўра экскурсантам было прапанавана ўспомніць любімую кнігу з дзяцінства і з дапамогай планшэтаў адказаць на пытанні віктарыны “Палескія рабінзоны”.
Завяршылася экскурсія на агляднай пляцоўцы Нацыянальнай бібліятэкі, адкуль госці змаглі палюбавацца Мінскам з вышыні птушынага палёту.
