13 верасня ў працяг навукова-практычных мерапрыемстваў, прымеркаваных да 25-гадовага юбілею Нацыянальнага цэнтра прававой інфармацыі Рэспублікі Беларусь (НЦПІ), на базе Гродзенскай абласной навуковай бібліятэкі імя Я.Ф. Карскага адбыўся круглы стол “Публічныя цэнтры прававой інфармацыі, папулярызацыя і развіццё”.
Арганізатарам мерапрыемства выступіў Рэгіянальны цэнтр прававой інфармацыі Гродзенскай вобласці. Удзел узялі прадстаўнікі НЦПІ, абласной калегіі адвакатаў, Гродзенскай натарыяльнай акругі, а таксама супрацоўнікі публічных бібліятэк рэгіёна.
У рамках круглага стала былі абмеркаваны перспектывы развіцця і ўдасканалення работы рэспубліканскай сеткі публічных цэнтраў прававой інфармацыі (ПЦПІ), адзначаны напрамкі ўзаемадзеяння бібліятэк з адвакатамі і натарыусамі ў частцы прававой асветы грамадзян. У ходзе сустрэчы супрацоўнікі ПЦПІ абмяняліся вопытам работы па фарміраванні прававой культуры карыстальнікаў.
Нацыянальную бібліятэку прадставіла галоўны бібліятэкар навукова-даследчага аддзела бібліятэказнаўства Ірына Кукета. У сваім выступленні яна адзначыла ролю Нацыянальнай бібліятэкі як метадычнага і каардынацыйнага цэнтра для ПЦПІ рэспублікі, а таксама азнаёміла з вынікамі статыстычнага маніторынгу дзейнасці цэнтраў за 2021 год.
Матэрыял пададзены навукова-даследчым аддзелам бібліятэказнаўства.
