5 лютага 2009 года а 16-й гадзіне ў атрыуме 2-га паверха Нацыянальнай бібліятэкі Беларусі адбудзецца цырымонія перадачы калекцыі кніг, атрыманых ад Пасольства Кітайскай Народнай Рэспублікі ў рамках праграмы “Акно ў Кітай”.
Нацыянальная бібліятэка Кітая пачала ажыццяўляць сваю буйнамаштабную праграму “Акно ў Кітай” у адносінах Нацыянальнай бібліятэкі Беларусі пасля падпісання ў 2007 г. Мемарандума аб ўзаемаразуменні паміж дзвюма бібліятэкамі, разлічанага на 2006 – 2010 гг.
Першая партыя кніг (каля 600 найменняў) уключае выданні па філасофіі, юрыспрудэнцыі, гісторыі, культуры і мастацтве Кітая. Дастаткова поўна прадстаўлены кодэкс законаў Кітайскай Народнай Рэспублікі; многія публікацыі выдадзены ў выглядзе серыйных выданняў. Так, напрыклад, серыя “Класічны кітайскі жывапіс у замежных калекцыях” прадстаўлена ў 8 тамах. Асобна можна вылучыць маляўнічыя альбомы па мастацтве, а таксама выданні, якія прадстаўляюць традыцыйныя кітайскія касцюмы.
Большасць кніг выдадзена паралельна на дзвюх мовах – кітайскай і англійскай, што значна пашырыць кола карыстальнікаў.
Цеснае эканамічнае і палітычнае супрацоўніцтва паміж нашымі краінамі адлюстроўваецца ў павышанай цікавасці да 5000-гадовай гісторыі і культуры Кітая. Публікацыі, атрыманыя Нацыянальнай бібліятэкай Беларусі ў рамках праграмы “Акно ў Кітай”, пакладуць пачатак стварэнню унікальнай кніжнай калекцыі пра гэту краіну.
Ва ўрачыстай цырымоніі адкрыцця выстаўкі прыме ўдзел пасол Кітайскай Народнай Рэспублікі ў Рэспубліцы Беларусь Лу Гуйчэн.
Уваход цэнтральны.
Тэлефон для даведак: 293-27-64, 293-27-66.
Е-mail: pr@nlb.by
