З 1 па 25 лютага 2009 года ў зале беларускай літаратуры (пам. 205) праходзіць кніжная выстаўка “Мастацкая вобразнасць і глыбокі навуковы падыход”, прысвечаная 75-годдзю Арсеня Сяргеевіча Ліса, фалькларыста, літаратуразнаўца і краязнаўца.
Выстаўка складаецца з трох раздзелаў. У першым, які мае назву “Падзвіжнік, вучоны, глыбокі даследчык беларускай традыцыйнай культуры”, прадстаўлены творы аўтара. Гэта кнігі і публікацыі з калектыўных зборнікаў і часопісаў. Другі раздзел “Зацікаўлена, моцна, па-навуковаму глыбінна” змяшчае выданні, складзеныя або адрэдагаваныя А.С. Лісам. Апошні раздзел “Абраным шляхам” знаёміць з матэрыяламі пра творчасць вучонага. На выстаўцы экспануецца каля 60 кніг і звыш 30 часопісаў.
Першая публікацыя Арсеня Ліса (артыкул пра мастака Паўла Южыка) з’явілася ў газеце “Літаратура і мастацтва” ў 1955 г. Пазней выйшлі ў свет артыкулы па гісторыі мастацтва, літаратуры і навукі.
Пяру А.С. Ліса належаць наступныя выданні: “Народно-поэтическое творчество Западной Белоруссии” (1965), “Браніслаў Тарашкевіч” (1966), “Мікола Шчакаціхін” (1968), “Пётра Сергіевіч” (1970), “Купальскія песні” (1974), “Пякучай маланкі след” (1981), “Вечны вандроўнік” (1984), “Валачобныя песні” (1989), “Песню – у спадчыну: мастацтвазнаўчыя артыкулы” (1989), “Жніўныя песні” (1993), “Цяжкая дарога свабоды” (1994), “Каляндарна-абрадавая творчасць беларусаў. Сістэма жанраў. Эстэтычны аспект” (1998), “Беларуская каляндарна-абрадавая песня ў кантэксце фальклорных традыцый славян” (2008) і інш.
У ранні перыяд творчасці А.С. Ліс апублікаваў свае вершы. Яны былі надрукаваны ў паэтычных зборніках “Падарунак” (1958) і “Універсітэт паэтычны” (1971).
А.Ліс - адзін з укладальнікаў, аўтар уступных артыкулаў і каментарыяў да кніг акадэмічнай серыі "Беларуская народная творчасць". За ўдзел у гэтай працы яму была прысуджана Дзяржаўная прэмія Беларусі (1986).
Кантактны тэлефон: 293-27-16.
 |
 |
 ; |
