18 снежня ў бібліятэцы адбылося ўрачыстае адкрыццё выставы да навагодніх свят “Калядная палітра”.
Выстава “Калядная палітра” арганізавана сумесна з міжнародным грамадскім аб’яднаннем жывапісцаў, графікаў, скульптараў, мастацтвазнаўцаў і прадстаўнікоў іншых творчых прафесій – “Еўразійская мастацкая садружнасць”. Аб’яднаннем і праваслаўным прыходам храма Нараджэння Найсвяцейшай Багародзіцы (в. Тарасава) быў зладжаны ІІ Міжнародны фестываль-конкурс дзіцячай творчасці. У конкурсе ўзялі ўдзел 460 юных мастакоў – беларусы ўзростам ад 4 да 17 гадоў з усёй краіны. Найлепшыя работы пераможцаў конкурсу, найцудоўнейшыя зімовыя фантазіі ад дзетак з усёй Беларусі прадстаўляе прымеркаваная да навагодніх свят выстава.
У “Каляднай палітры” – традыцыйнае святкаванне Каляд, зімовыя пейзажы, сімвалы навагодніх свят, казачныя сюжэты. Работы аб’яднаны агульнай тэмай – святочная пераднавагодняя зіма. Яна паўстае казачнай, поўнай надзей, усмешак, мар і чакання цудаў. Экспануюцца выкананыя гуашшу і алоўкамі арнаментальныя кампазіцыі, вясёлыя, святочныя і па-зімоваму суровыя, таямнічыя работы. Прадстаўлены выразаныя з паперы сімвалы ўрачыстай зімы і зробленыя ўручную калядныя лялькі.
У цэнтры ўвагі мастакоў – атрыбуты Новага года, калядоўшчыкі і анёлкі, а таксама асабістыя прыдумкі і фантазіі аб звычайных людзях і фантастычных магчымасцях свята. Птушачкі, казачныя персанажы, зімовыя хаткі, елкі, таемныя краявіды, зорныя нябёсы, анёлкі, падзеі Раства, святочныя гулянні, шматлікія снегавікі, снежкі і іншыя зімовыя гульні – мастакі імкнуліся падаваць знаёмыя сюжэты ў індывідуальных манерах або выбіралі незвычайныя вобразы і сітуацыі. Заўважна перспектыўнасць і адметнасць работ, талент, з якім працуюць пачаткоўцы.
У мерапрыемстве ўзялі ўдзел намеснік генеральнага дырэктара Нацыянальнай бібліятэкі Беларусі Людміла Высоцкая, старшыня Міжнароднага грамадскага аб’яднання “Еўразійская мастацкая садружнасць”, куратар конкурсу “Калядная палітра” Ларыса Шахновіч, мастак-педагог, член Міжнароднай гільдыі жывапісцаў, рэгіянальнай грамадскай арганізацыі “Творчая садружнасць «Еўразійскі мастацкі саюз»” (Масква) Віктар Данілаў, мастак-педагог, член-карэспандэнт Міжнароднай акадэміі культуры і мастацтва (Масква), член Беларускага саюза мастакоў, рэгіянальнай грамадскай арганізацыі “Творчая садружнасць «Еўразійскі мастацкі саюз»” (Масква) Леанід Гоманаў, мастак, член арт-студыі “АКВАВІР”, адзначана спецыяльнай прэміяй Прэзідэнта Рэспублікі Беларусь “За вялікі ўнёсак у выхаванне творчай моладзі”, член журы ІІ Міжнароднага фестывалю-конкурсу дзіцячай творчасці Гунефа Мацюшэнкава, мастак-педагог, член Міжнароднага грамадскага аб’яднання “Еўразійская мастацкая садружнасць”, сакуратар ІІ Міжнароднага фестывалю-конкурсу дзіцячай творчасці “Калядная палітра” Юлія Коба.
Напярэдадні навагодніх свят цеплыня, стараннасць, майстэрства юных творцаў-канкурсантаў “Каляднай палітры” дораць свята, радасць і прыемнае прадчуванне цуду супрацоўнікам і наведвальнікам бібліятэкі.
Выстава будзе працаваць у галерэі “Ракурс” (2-гі паверх) да 28 студзеня 2024 года.
Дата яе заканчэння можа быць зменена.
Уваход – па чытацкім білеце або білеце сацыякультурнага цэнтра.
Час работы выставы адпавядае рэжыму работы бібліятэкі.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.