23 лістапада ў галерэі “Ракурс” Нацыянальнай бібліятэкі Беларусі адбылося ўрачыстае адкрыццё выстаўкі “Арт-крок”.
Арганізатарамі мерапрыемства выступілі Нацыянальная бібліятэка Беларусі і Міжнародная гільдыя жывапісцаў.
Выстаўка праходзіць у рамках праекта Міністэрства культуры Рэспублікі Беларусь “Зямля пад белымі крыламі”, які распачаўся 3 верасня ў Нацыянальным мастацкім музеі Беларусі.
Больш за 100 работ, выкананых за апошні год, гледачам прадставілі акварэлісты, жывапісцы, майстры графікі і фотамастацтва. Сярод іх вядомыя мастакі, імёны якіх ужо добра знаёмыя беларускаму гледачу, а таксама тыя, хто толькі пачынае свой творчы шлях.
Адкрыў выстаўку куратар праекта, загадчык аддзела галерэйна-выставачнай дзейнасці Нацыянальнай бібліятэкі Беларусі, старшыня Міжнароднай гільдыі жывапісцаў Фёдар Ястраб.
У мерапрыемстве ўзялі ўдзел намеснік дырэктара па навуковай рабоце і сувязях з грамадскасцю Нацыянальнай бібліятэкі Беларусі Людміла Кірухіна, мастачка Марта Шматава, мастак-жывапісец, член Міжнароднай гільдыі жывапісцаў Рыгор Несцераў.
Музычнай творчасцю гасцей вернісажу парадаваў дуэт скрыпачоў “Дольчэ Віта”. Меладычнасць скрыпкі і неверагоднае гучанне пілы прынеслі сапраўднае задавальненне знаўцам музыкі.
Выстаўка размяшчаецца ў трох галерэях Нацыянальнай бібліятэкі Беларусі (“Лабірынт”, “Атрыум” і “Ракурс”) і будзе доўжыцца да 15 студзеня 2011 г.
 |
 |
 |
 |
 |
 |
