25 лістапада а 17-й гадзіне ў галерэі “Лабірынт” адбудзецца прэзентацыя кнігі Уладзіміра Караткевіча “Дзікае паляванне караля Стаха”.
Напярэдадні 80-годдзя з дня нараджэння класіка беларускай літаратуры Уладзіміра Караткевіча Міністэрства культуры Рэспублікі Беларусь сумесна з грамадскім аб’яднаннем “Беларускі фонд культуры” і Нацыянальнай бібліятэкай Беларусі прэзентуе новае выданне вядомай і любімай чытачамі аповесці пісьменніка “Дзікае паляванне караля Стаха”, выдадзенай на беларускай, рускай, украінскай і англійскай мовах.
Падарункавае выданне “Дзікае паляванне караля Стаха” стане своеасаблівым друкаваным помнікам Уладзіміру Караткевічу і зойме годнае месца на паліцах кожнай бібліятэкі нашай краіны.
У рамках прэзентацыі кнігі будзе прадстаўлена выстаўка асобных выданняў аповесці “Дзікае паляванне караля Стаха” з фондаў Нацыянальнай бібліятэкі Беларусі на розных мовах свету, а таксама кніжная выстаўка “Свет шчодры. Свет мяне паўторыць…" , прысвечаная 80-годдзю Уладзіміра Караткевіча.
У мерапрыемстве возьмуць удзел прадстаўнікі Міністэрства культуры і Міністэрства інфармацыі Рэспублікі Беларусь, Беларускага фонду культуры, Нацыянальнай бібліятэкі Беларусі, музеяў, выдавецтваў, бібліятэк Мінска, дыпламатычнага корпуса.
Гасцей чакае выступленне Беларускага паэтычнага тэатра аднаго акцёра "Зніч" (дырэктар і мастацкі кіраўнік – Галіна Дзягілева).
Тэлефон для даведак: 293-27-67.
Е-mail: pr@nlb.by