Да 110-годдзя з дня нараджэння беларускага пісьменніка Леаніда Януаравіча Прокшы (1912–1994) у зале беларускай літаратуры (пам. 205) з 1 красавіка па 17 мая праходзіць выстаўка “З добрым набыткам”.
Адметнае месца сярод беларускіх пісьменнікаў належыць Леаніду Прокшу, які плённа працаваў у жанры сатырычнай і гумарыстычнай прозы.
Пісаў Л. Прокша на беларускай, рускай і польскай мовах. Працаваў у розных празаічных жанрах, імкнуўся да адкрыцця новых творчых гарызонтаў. Вастрынёй гумару вызначаюцца яго памфлеты, фельетоны, апавяданні, гумарэскі, сатырычныя замалёўкі. Пісьменнік у сваёй творчасці адгукаўся на самыя надзённыя праблемы жыцця, звяртаўся да актуальных сацыяльных тэм, выкрываў маральныя заганы людзей, уздымаў праблемы агульначалавечых каштоўнасцей, норм і правіл грамадства. Апісаныя сатырыкам гісторыі вызначаюцца цікавасцю, запамінальнасцю, рэалістычнасцю характараў герояў, падрабязнасцю бытавых дэталяў.
Літаратурная спадчына Л. Прокшы ў экспазіцыі прадстаўлена зборнікам апавяданняў і нарысаў “Источник красоты”, кнігамі гумарыстычных апавяданняў і памфлетаў “Каб жылося-вялося”, “Кантроль сумлення”, “Не ў тым поездзе”, “Самадзейнасць у ліфце”, “Зося смяецца”, аповесцю “Ці варта было жаніцца”, раманамі “Пакуль жывеш на свеце…”, “Туника Несса”, “Урок любві і нянавісці”, кнігамі публіцыстыкі “По обе стороны океана”, “Туман развеецца”, а таксама творамі для дзяцей (аповесцямі “Мальчик в больших башмаках”, “Незвычайныя прыгоды хлопчыка Бульбінкі”, “Стрэлы над ярам”) і інш.
Дапаўняюць выстаўку творы пісьменніка, апублікаваныя на старонках перыядычных выданняў і ў калектыўных зборніках, матэрыялы пра жыццё і творчасць празаіка.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.
